മുടിക്ക് നിറം നൽകുമ്പോൾ

മുടിക്ക് പല നിറങ്ങൾ നൽകുന്നത് ഇപ്പോഴത്തെ ഫാഷൻ ട്രെൻഡ് ആണ്. ഹെയർ കളറിങ്ങിൽ ശ്രദ്ധിക്കേണ്ട ആരോഗ്യകാര്യങ്ങളെക്കുറിച്ച് അറിയാം

- ഡോ.സൗമ്യജഗദീശൻ

ഇപ്പോഴത്തെ ട്രെൻഡുകളിലൊന്നാണ് മുടി കളർ ചെയ്യുന്നത്. ഇതിന് യുവാക്കളെന്നോ മധ്യവയസ്ക രെന്നോ വ്യത്യാസമില്ല. ഭൂരിഭാഗം പേരും ഭാഗികമായാണ് മുടിയ്ക്ക് നിറം നൽകുന്നത്. ചിലരാകട്ടെ, മുടി പൂർണമായും കളർ ചെയ്യാറുണ്ട്.

കളർ ചെയ്യുന്നത് മുടിയുടെ ആരോഗ്യത്തിന് ദോഷം ചെയ്യാം. കാരണം, കളർ ചെയ്യുന്ന മുടിയിഴകൾക്ക് ബലം കുറയും. ബ്ലീച്ച് ചെയ്ത ശേഷമാണ് മുടിക്ക് നിറം നൽകുന്നതെങ്കിൽ ആ മുടിയിഴകൾ കൂടുതൽ ദുർബലമാകും. എന്നാൽ, ഹെയർ കളറിങ്ങിൽ വിദഗ്ധരായവരുടെ മേൽനോട്ടത്തിൽ മുടി കളർ ചെയ്യുമ്പോൾ മുൻകാലത്തെ അത്രയും പ്രശ്നങ്ങൾ പൊതുവേ ഉണ്ടാകാറില്ല.

പരിചയസമ്പന്നരായ സ്റ്റൈലിസ്റ്റിന്റെ മേൽനോട്ടത്തിൽ മാത്രം കളറിങ്ചെയ്യുക. മുടിയുടെ സ്വഭാവമറിഞ്ഞ് അതിന് യോജിച്ച രീതികൾ നിർദേശിക്കാൻ അവർക്ക് കഴിയും.

നിറം നൽകുന്നത് അതിലടങ്ങിയിരിക്കുന്ന രാസ ഘടകങ്ങൾ മുടിയുടെ ആരോഗ്യത്തെ നശിപ്പിക്കാനിടയാക്കിയേക്കും. അതിനാൽ മുടിയുടെ സ്വഭാവം, ഉപയോഗിക്കു ന്ന നിറത്തിന്റെ പ്രത്യേകതകൾ എന്നിവ കൃത്യമായി മനസ്സിലാക്കി വേണം കളർ ചെയ്യാൻ.

നിറം നൽകുന്നതിന് ഒരു ദിവസം മുൻപ് മുടി കണ്ടീഷൻ ചെയ്യുന്നത് നല്ലതാണ്. നിറം നൽകിയ മുടിക്കായി പ്രത്യേകം തയ്യാറാക്കിയ കളർ പ്രൊട്ടക്ഷനുള്ള ഷാംപൂവും കണ്ടീഷണറും മാത്രം ഉപയോഗിക്കുക.