പരദൂഷണത്തിന് ചെവികൊടുക്കല്ലേ

 പരദൂഷണം പറയുന്നവർ അതിൽ സന്തോഷം കണ്ടെത്തുന്നവരാണ്. മറ്റുള്ളവർ തന്നെ കൂടുതലായി ശ്രദ്ധിക്കാനും അതുവഴി അവരുടെ പരിഗണനയും പ്രീതിയും നേടിയെടുക്കാനുമാണ് പലപ്പോഴും ഇവർ ലക്ഷ്യമിടുന്നത്

- ഡോ.സെബിൻഎസ്.കൊട്ടാരം കൺസൾട്ടന്റ്സൈക്കോളജിസ്റ്റ് മോട്ടിവേഷണൽട്രെയ്നർ drsebinskottaram.blogspot.com

ഇത് ഞാൻ പറഞ്ഞതാണെന്ന് പറയണ്ട, മനസ്സിൽ വെച്ചാൽ മതി. അവൻ നിന്നെക്കുറിച്ച് പറഞ്ഞതാ. ഇങ്ങനെ പറയാൻ അവനാരാ പൊടിപ്പും തൊങ്ങലും വെച്ച് പരദൂഷണം ഫോണിലൂടെ വിളമ്പിയതിന്റെ അവസാന വാചകങ്ങളാണിത്.

ഒരാളുടെ അഭാവത്തിൽ ആ വ്യക്തി പറഞ്ഞതോ ചെയ്തതോ ആണെന്ന് മറ്റൊരാളോട് എരിവും പുളിയും ചേർത്ത് പറയുന്നതാണ് പരദൂഷണം, അഥവാ ഏഷണി. ഇതിൽ വെറും പത്തുശതമാനം മാത്രമായിരിക്കും സത്യം. ബാക്കി 90 ശതമാനവും ആവശ്യത്തിന് മസാലയും സ്വന്തം താത്പര്യങ്ങളും വൈകാരികവിഷവും ചേർത്ത് പറയുമ്പോൾ അത് ആളുകളെ തമ്മിൽ അകറ്റുന്നു. ബന്ധങ്ങൾ മുറിയാൻ ഇതിടയാക്കുന്നു. മറ്റുള്ളവരെക്കുറിച്ചുള്ള ധാരണ മോശമാക്കാനും ഇത് കാരണമാവുന്നുണ്ട്. പലപ്പോഴും പുറമേ നിരുപദ്രവമെന്ന് തോന്നുമെങ്കിലും പരദൂഷണത്തിന് വ്യക്തിബന്ധങ്ങളിൽ, അത് വീട്ടിലായാലും ഓഫീസിലായാലും സമൂഹത്തിലായാലും ദൂരവ്യാപകപ്രത്യാഘാതങ്ങൾ സൃഷ്ടിക്കാനുള്ള കഴിവുണ്ട്. കുറേശ്ശെയായി മറ്റൊരു വ്യക്തിയെക്കുറിച്ച് കുറ്റങ്ങൾ കേൾക്കുകയും ചർച്ചചെ കയും ചെയ്യുന്നത് ആ വ്യക്തിയുമായി, മാനസിക മായ അകൽച്ച സൃഷ്ടിക്കും. ഇത് പിന്നീട് ഒരുമിച്ചുള്ള പ്രവർത്തനങ്ങളെയും കൂട്ടായ്മകളെയും ബാധിക്കും.

പരദൂഷകരുടെ മനസ്സിലിരിപ്പ്

പരദൂഷണം പറയുന്നവർ അതിൽ സന്തോഷം കണ്ടെത്തുന്നവരാണ്. മറ്റുള്ളവർ തന്നെ കൂടുതലായി ശ്രദ്ധിക്കാനും അതുവഴി അവരുടെ പരിഗണനയും പ്രീതിയും നേടിയെടുക്കാനുമാണ് പലപ്പോഴും പരദൂഷകർ ലക്ഷ്യമിടുന്നത്.