നന്ദി തരുന്ന നന്മകൾ

നന്ദി പ്രസാദാത്മക വികാരമാണ്. നന്ദിനിറഞ്ഞ മനോഭാവമുള്ളവർക്ക് ശാരീരികവും സാമൂഹികവും മനഃശാസ്ത്രപരവും വൈകാരികവുമായ ഒട്ടേറെ ഗുണങ്ങൾ സ്വന്തമാക്കാനാകും

- ഡോ.സെബിൻഎസ്.കൊട്ടാരം കൺസൾട്ടന്റ്-സൈക്കോളജിസ്റ്റ് മോട്ടിവേഷണൽട്രെയ്നർ drsebinskottaram.blogspot.com

മുറ്റത്ത് പൂച്ചക്കുഞ്ഞുങ്ങൾ കളിക്കുന്നതിനിടയിലാണ് തുറന്നുകിടന്ന ഗേറ്റിലൂടെ ഒരു പട്ടി കുരച്ചുകൊണ്ട് വന്നത്. കൈയിൽ കിട്ടിയ വടിയെടുത്ത് എറിഞ്ഞതും പട്ടി ഓടിപ്പോയി. പട്ടി ഓടി പോയതോടെ പൂച്ചക്കുട്ടികൾ അടുത്തേക്കുവന്ന് കാലിൽ മുട്ടിയുരുമ്മി നന്ദി പ്രകടിപ്പിച്ചു.

നന്ദി പ്രസാദാത്മക വികാരമാണ്. നന്ദിനിറഞ്ഞ മനോഭാവമുള്ളവർക്ക് ശാരീരികവും സാമൂഹികവും മനഃശാസ്ത്രപരവും വൈകാരികവുമായ ഒട്ടേറെ ഗുണങ്ങൾ ജീവിതത്തിലുണ്ടാകുമെന്ന് പഠനങ്ങളിൽ വ്യക്തമാകുന്നു.

നന്ദിയുടെ ഗുണങ്ങൾ

നന്ദി നിറഞ്ഞ മനോഭാവം നല്ല അനുഭവങ്ങൾ സമ്മാനിക്കുന്നു. ശാരീരിക മാനസിക ആരോഗ്യം മെച്ചപ്പെടുത്തുന്നതിനൊപ്പം നല്ല ബന്ധങ്ങൾ സ്ഥാപിക്കാനും സഹായിക്കുന്നു. മറ്റുള്ളവർ നമുക്ക് ചെയ്ത നന്മകളോടും സഹായങ്ങളോടും നന്ദിനിറഞ്ഞ രീതിയിൽ പ്രതികരിക്കുന്നവർക്ക്, മറ്റുള്ളവർ കൂടുതൽ പ്രാധാന്യം കൊടുക്കും. സ്നേഹബന്ധങ്ങൾ വളരാൻ ഇതിടയാക്കും. അതിനാൽ കൊച്ചുകൊച്ചു കാര്യങ്ങളിൽപോലും നന്ദി പ്രകാശിപ്പിക്കുക. നല്ല ഭക്ഷണം കഴിച്ചാൽ അതുണ്ടാക്കിയ ആളോട് നന്നായിരുന്നു എന്നു പറയുക. അപ്പോൾ അടുത്ത തവണ അതിലും നന്നായി നിങ്ങൾക്കായി കാര്യങ്ങൾ ചെയ്യാൻ അവർക്ക് അത് പ്രചോദനമാകും.

കൂടെ ജോലിചെയ്യുന്നവരുടെ സേവനത്തിന് നന്ദി പറയുന്നത് അവരെ കൂടുതൽ കഠിനാധ്വാനം ചെയ്യാൻ പ്രചോദിപ്പിക്കുമെന്ന് മറ്റൊരു പഠനം വ്യക്തമാക്കുന്നു.