കാൻസറും ജീവിതശൈലിയും

കാൻസർ പ്രതിരോധത്തെ വളരെ വിശാലമായി കാണേണ്ടതാണ്. അത് കാൻസറിന് അപ്പുറം ഒരുവിധം രോഗങ്ങളെയൊക്കെ പ്രതിരോധിക്കാനുള്ള അവബോധ രൂപവത്കരണം തന്നെയാണ്

- ഡോ.വി.പി.ഗംഗാധരൻ

ജീവിതസാഹചര്യങ്ങളിലും രീതികളിലും വന്ന മാറ്റങ്ങൾ കാൻസർ വർധിപ്പിക്കുന്നുണ്ടോ?

കാൻസർ കൂടുന്നുണ്ട് എന്നുതന്നെയാണ് കണക്കുകൾ വ്യക്തമാക്കുന്നത്. അതിന് പല കാരണങ്ങളുണ്ട്. രോഗനിർണയത്തിനും ചികിത്സയ്ക്കുമുള്ള സാധ്യതകൾ കൂടിയത് ഒരു കാരണമാണ്. മുൻപ് പലയാളുകളിലും രോഗം കണ്ടത്താൻ പറ്റിയിരുന്നില്ല. ഇപ്പോൾ ഒട്ടുമിക്കവരിലും കണ്ടെത്താനാകുന്നുണ്ട്. അതിനപ്പുറവും രോഗം കൂടുന്നുണ്ട്. തെറ്റായ ജീവിതശൈലി കാൻസറിന്റെ പ്രധാന കാരണങ്ങളിലൊന്നാണ്. അക്കൂട്ടത്തിൽ പ്രധാനം ആഹാരത്തിൽ വന്ന മാറ്റങ്ങൾ തന്നെ രണ്ടുതരത്തിലാണ് ആ മാറ്റങ്ങൾ. ഒന്ന് ആഹാരരീതി അതായത് ആഹാരം തന്നെ മാറി. കഴിക്കുന്ന ആഹാരത്തിലെ ഘടകങ്ങളിൽ വന്ന മാറ്റങ്ങളാണ്‌ മറ്റൊന്ന്. പഴങ്ങൾ, പച്ചക്കറികൾ തുടങ്ങിയവയുടെ തോത്  കാര്യമായി കുറഞ്ഞിട്ടുണ്ട് ഇന്നത്തെ ഭക്ഷണത്തിൽ കൊഴുപ്പ്, നിറങ്ങൾ, മധുരം, കൃത്രിമരുചികൾ തുടങ്ങിയവ വളരെ കൂടി. ഇതൊക്കെ കാൻസർ സാധ്യത കൂട്ടുന്ന ഘടകങ്ങളാണ്.

ആഹാരംപോലെതന്നെ പ്രധാനമാണ് വ്യായാമവും. അമിതവണ്ണം പോലുള്ള പ്രശ്നങ്ങൾ കാൻസർ സാധ്യത കൂട്ടുന്ന ഘടകങ്ങളാണെന്ന് കണ്ടെത്തിയിട്ടുണ്ട്. പഴങ്ങളും പച്ചക്കറികളും നാരുള്ള ഇനങ്ങളും ധാരാളം അടങ്ങിയ ഭക്ഷണം ശീലമാക്കുകയും മതിയായ ശാരീരികായാസം ഉറപ്പാക്കുകയും ചെയ്യുന്നത് കാൻസർ പ്രതിരോധത്തിലും വളരെ പ്രധാനമാണ്.

കാൻസർ പ്രതിരോധത്തിലെ പ്രധാന വെല്ലുവിളികൾ എന്തൊക്കെയാണ്?

കാൻസർപ്രതിരോധം എന്നതിൽ പ്രധാനമായും രണ്ട് കാര്യങ്ങളുണ്ട്. ഒന്നാമത് സമഗ്ര പ്രതിരോധം. രണ്ട് നേരത്തേ രോഗം കണ്ടുപിടിക്കൽ. കാൻസർചികിത്സയിലെ പ്രധാന വെല്ലുവിളി വളരെ വൈകി മാത്രം രോഗം കണ്ടെത്തുന്നു എന്നതാണ്. കാൻസർ പ്രതിരോധത്തിനോ രോഗം വന്നവരിൽ നേരത്തേ കണ്ടെത്തുന്നതിനോ ഉള്ള പദ്ധതി നമുക്കില്ല.

കാൻസർ പ്രതിരോധത്തെ വളരെ വിശാലമായി കാണേണ്ടതാണ്. അത് കാൻസറിനപ്പുറം ഒരുവിധം രോഗങ്ങളെയൊക്കെ പ്രതിരോധിക്കാനുള്ള അവബോധ രൂപവത്കരണം തന്നെയാണ്. സ്കൂൾതലം മുതലേ ശരിയായ ഭക്ഷണത്തെക്കുറിച്ചും ശരിയായ ജീവിതശൈലിയെക്കുറിച്ചുമുള്ള ശാസ്ത്രീയാവബോധം പകരാൻ നമുക്ക് കഴിയേണ്ടതുണ്ട്.