LIFE LONG ഓൺ ദി ട്രാക്ക്

അന്തർദേശീയ ലോങ്ജംപ് താരം നയന ജെയിംസിന്റെയും പങ്കാളി കേരള ട്വന്റി20 ക്രിക്കറ്റർ കെവിന്റെയും ജീവിതവഴിയിലൂടെ...

- കെ.പി.എം. റിയാസ്

എട്ടു വർഷം മുമ്പ് തിരുവനന്തപുരം യൂനിവേഴ്സിറ്റി സ്റ്റേഡിയത്തിൽ നെറ്റ്സിൽ പ്രാക്ടിസിനെത്തിയതാണ് കേരളത്തിന്റെയും എസ്.ബി.ടിയുടെയും ട്വന്റി20 ക്രിക്കറ്റ് താരം കെവിൻ പീറ്റർ ഓസ്കാർ. ഈ സമയം ഗ്രൗണ്ടിൽ ഓടിയും ചാടിയും ഒറ്റക്ക് പരിശീലനം നടത്തുന്ന പെൺകുട്ടിയിൽ കണ്ണുകളുടക്കാൻ അധികനേരമൊന്നും വേണ്ടിവന്നില്ല. മഴയും വെയിലും വകവെക്കാതെ രാവിലെയും വൈകുന്നേരവും കഠിനാധ്വാനം ചെയ്യുന്ന അവളെ അവിടെ കാണുന്നത് പതിവായി. എപ്പോഴോ ചെറുപുഞ്ചിരിയിൽ തുടങ്ങിയ പരിചയം സൗഹൃദത്തിലൂടെ വളർന്ന് വിവാഹത്തിലേക്ക്.

ഗുജറാത്തിലെ ഗാന്ധിനഗർ ഐ.ഐ.ടി സ്റ്റേഡിയത്തിൽ ദേശീയ ഗെയിംസ് ലോങ്ജംപ് മത്സരത്തിനിടെ ഓരോ ചാട്ടം കഴിയുമ്പോഴും നയന ജെയിംസ് എന്ന ഇന്ത്യയുടെ അന്തർദേശീയതാരം പരിശീലകന്റെയും പിന്നെ കെവിന്റെയും അരികിലേക്ക് നടക്കും. എല്ലാം അവസാനിച്ചെന്ന് തോന്നിയയിടത്തു നിന്ന് എണീറ്റ് ഉയരത്തിലേക്കു ചാടിയ നയന സ്വർണ നേട്ടത്തിന്റെ ക്രെഡിറ്റിൽ നല്ലൊരുപാതി കെവിന് കൊടുക്കുന്നു.

കെവിനാവട്ടെ, താൻ ജീവിതം പഠിക്കുന്നതുതന്നെ നല്ലപാതിയിൽ നിന്നാണെന്ന പക്ഷക്കാരനും. പോസിറ്റിവ് എനർജിയോടെ പരസ്പരം കൊണ്ടും കൊടുത്തും കരിയറിനെയും ജീവിതത്തെയും പ്രണയിക്കുകയാണ് ഇരുവരും.

ഒന്നു മിണ്ടാൻ രണ്ടു കൊല്ലം

നയന: തിരുവനന്തപുരം മാർ ഇവാനിയോസ് കോളജിൽ ബി.കോമിന് പഠിക്കുകയായിരുന്നു ഞാൻ. ബോബി അലോഷ്യസാണ് എന്നെ തിരുവനന്തപുരത്തേക്ക് വിളിച്ചത്. രാവിലെയും വൈകുന്നേരവും പ്രാക്ടിസിനിറങ്ങും. രണ്ടു കൊല്ലത്തോളം യൂനിവേഴ്സിറ്റി ഗ്രൗണ്ടിലും പുറത്തുമൊക്കെ വെച്ച് ഇടക്കിടെ കണ്ടിരുന്നെങ്കിലും അങ്ങോട്ടുമിങ്ങോട്ടും മിണ്ടിയിരുന്നില്ല ഞങ്ങൾ. മൗനം ബ്രേക് ചെയ്തത് ഒരു അത്ലറ്റിക് മീറ്റിനിടെയാണ്. ലോങ്ജംപിൽ എനിക്ക് ഗോൾഡ് വന്നപ്പോ പുള്ളിക്കാരൻ അതൊരു അവസരമായി എടുത്തതാണോ എന്തോ. അടുത്തുവന്ന് കൺഗ്രാറ്റ്സ് പറഞ്ഞു. എനിക്കും അതൊരു ഓപണിങ്ങായിരുന്നു. കൺഗ്രാറ്റ്സിലും താങ്ക്സിലും തുടങ്ങിയ മിണ്ടലാണ് ഇവിടംവരെ എത്തിയത്.