ഇസ്രോയുടെ അമരക്കാരൻ.

ബഹിരാകാശ ദൗത്യങ്ങളുടെ പേരിൽ രാജ്വത്തിനൊപ്പം ഐ.എസ്.ആർ.ഒയും വിജയപീഠമേറുമ്പോൾ ചെയർമാനായ എസ്. സോമനാഥിലൂടെ മലയാളികൾക്കും അഭിമാനിക്കാനേറെയുണ്ട്. അദ്ദേഹത്തിനു മുന്നിൽ ഇനിയും ദൗത്യങ്ങൾ നിരവധിയാണ്...

- വിഷ്ണു, ജെ

2023 ആഗസ്റ്റ് 23, ഇന്ത്യൻ ബഹിരാകാശരംഗം ഒരു നാഴികക്കല്ല് പിന്നിട്ട ദിനമായിരുന്നു അന്ന് ആർക്കും പ്രാപ്യമല്ലാതിരുന്ന നേട്ടം ഇന്ത്യ കൈയെത്തിപ്പിടിച്ച ദിനം. മൂന്നാം ചാന്ദ്ര ദൗത്യം വിജയകരമായി പൂർത്തികരിച്ചാണ് ഇന്ത്യ ലോകത്തിന്റെ നെറുകെയിലേക്ക് കയറിയത്. ചന്ദ്രന്റെ ദക്ഷിണ ധ്രുവത്തിൽ ചാന്ദ്രപേടകത്തിന്റെ സോഫ്റ്റാൻഡിങ് നടത്തിയാണ് നിർണായകമായ നാഴികക്കല്ല് ഇന്ത്യ പിന്നിട്ടത്. 

ദിവസങ്ങൾക്കകം മറ്റൊരു നേട്ടത്തിനുകൂടി രാജ്യം സാക്ഷിയായി. സൂര്യന്റെ രഹസ്യങ്ങൾ തേടിയുള്ള ഇന്ത്യയുടെ സൗരദൗത്യം ആദിത്യ എൽ 1 ശ്രീഹരിക്കോട്ടയിലെ സതീഷ് ധവാൻ സ്പേസ് സെന്ററിൽ നിന്ന് കുതിച്ചുയർന്നതോടെ ശാസ്ത്രനേട്ടങ്ങളുടെ പേരിൽ ആഗോള ശ്രദ്ധാകേന്ദ്രമായി ഇന്ത്യ മാറി. ശാസ്ത്രനേട്ടങ്ങളുടെ മുഴുവൻ ക്രഡിറ്റും രാജ്യത്തെ ജനത നൽകുന്നത് ഇന്ത്യൻ ബഹിരാകാശ ഏജൻസിയായ ഐ.എസ്.ആർ.ഒക്കാണ്. ബഹിരാകാശ ദൗത്യങ്ങളുടെ പേരിൽ രാജ്യത്തിനൊപ്പം ഐ.എസ്.ആർ.ഒയും വിജയപീഠമേറുമ്പോൾ മലയാളികൾക്കും അഭിമാനിക്കാനേറെയാണ്.

ലോകത്തിന്റെ ഗതിമാറ്റാൻ തന്നെ കരുത്തുള്ള ദൗത്യങ്ങൾ ഐ.എസ്.ആർ.ഒ വിജയകരമായി നടപ്പിലാക്കുമ്പോൾ തലപത്തുണ്ടായിരുന്നത് ഒരു മലയാളിയാണെന്നതാണ് കേരളത്തിന്റെ അഭിമാനം വാനോളം ഉയർത്തുന്നത്.

 2022ൽ ഐ.എസ്.ആർ.ഒ യുടെ തലപ്പത്തെത്തിയ എസ്.സോമനാഥിന്റെ നേതൃത്വത്തിലാണ് ഇന്ത്യ സുപ്രധാനമായ ശാസ്ത്രദൗത്യങ്ങൾ യാഥാർഥ്യമാക്കിയത്. ആലപ്പുഴ ജില്ലയിലെ തുറവൂരിലെ ഗ്രാമത്തിൽ ജനിച്ച് മലയാളം മീഡിയം സ്കൂളിൽ പഠിച്ചാണ് സോമനാഥ് ഇന്ത്യയിലെ ഏറ്റവും ഉന്നതമായ ശാസ്ത്രസ്ഥാപനത്തിലേക്കെത്തിയത്. സാധാരണ കുടുംബത്തിലെ തീർത്തും സാധാരണമായ സാഹചര്യങ്ങളിൽ നിന്നുമായിരുന്നു ഐ.എസ്.ആർ.ഒ യിലേക്കുള്ള സോമനാഥിന്റെ യാത്ര.