ક્યાં લેવું ઉચ્ચ શિક્ષણ?

દસમા કે બારમા ધોરણ પછી ઉચ્ચ અભ્યાસ કયો કરવો એ પ્રશ્ન દરેક વિદ્યાર્થી અને સાથોસાથ એમના વાલીઓને સતાવતો હોય છે. આ પ્રશ્નનો ઉત્તર મળે તો પછી બીજો પ્રશ્ન આવેઃ કઈ કૉલેજ કે યુનિવર્સિટી પસંદ કરવી? શિક્ષણધામની પસંદગીમાં ફીની ગણતરી, અભ્યાસ પૂરો કર્યા પછી નોકરી કે રોજગારની તક, વગેરેને ધ્યાનમાં લેવામાં આવે ગુજરાતની કેટલીક કૉલેજ-યુનિવર્સિટીમાં ઉચ્ચ અભ્યાસની કેવી સગવડ છે એની ઉપયોગી માહિતી અહીં પીરસવામાં આવી છે.

ગુજરાત સરકાર દ્વારા ૨૯ વર્ષ પહેલાં અમદાવાદમાં સ્થાપવામાં આવેલી ‘બાબાસાહેબ આંબેડકર ઓપન યુનિવર્સિટી’ દેશની એકમાત્ર એવી ઓપન યુનિવર્સિટી છે, જેને યુજીસી તરફથી કૅટેગરી-એક યુનિવર્સિટીનો દરજ્જો મળ્યો હોય. આ કૅટેગરીને લીધે આ યુનિવર્સિટી હવે વિશ્વની પ્રથમ હરોળની પ૦૦ યુનિવર્સિટી સાથે સ્પર્ધા કરી શકશે.

‘બાબાસાહેબ આંબેડકર ઓપન યુનિવર્સિટી’નાં કુલપતિ પ્રોફેસર ડૉ. અમી ઉપાધ્યાય કહે છે કે છેલ્લાં ૨૯ વર્ષમાં અમારી યુનિવર્સિટીએ અનેક સિદ્ધિ હાંસલ કરી છે. સમાજના તમામ વર્ગને શિક્ષણ તો પહોંચાડવામાં આવી રહ્યું છે, પણ સાથે સાથે અમારી યુનિવર્સિટીએ સામાજિક, આર્થિક અને વહીવટી ક્ષેત્રે પણ અનેક શિખરો સર કર્યાં છે.

અમદાવાદમાં એસજી રોડ પર ૨૦ એકર વિસ્તારમાં આવેલી ‘બાબાસાહેબ આંબેડકર ઓપન યુનિવર્સિટી’નાં આજે ૩૦૦ જેટલાં કેન્દ્રો છે. અમદાવાદમાં મસમોટો સ્ટુડિયો છે, જ્યાં ચાર હજારથી વધુ લેક્ચર રેકૉર્ડ કરાયાં છે. ગુજરાતમાં રાજકોટ, પાટણ, સુરત, ભાવનગર, ગોધરા અને ભૂજ ખાતે યુનિવર્સિટીનાં છ પ્રાદેશિક કેન્દ્રો છે. વિદ્યાર્થીઓને શિક્ષણ માટે દૂર જવું ન પડે એ હેતુથી રાજ્યનાં તમામ તાલુકામથક ખાતે યુનિવર્સિટીએ અભ્યાસ કેન્દ્રો પણ શરુ કર્યા છે.

ડૉ. અમી ઉપાધ્યાય કહે છે કે બાબાસાહેબ આંબેડકર ઓપન યુનિવર્સિટી’ અનેક સ્નાતક, અનુસ્નાતક, અનુસ્નાતક ડિપ્લોમા, સર્ટિફિકેટ કોર્સિસ અને વૉકેશનલ અભ્યાસક્રમો ચલાવે છે. અભ્યાસક્રમોની કુલ સંખ્યા ૮૦ જેટલી છે. યોગ, કુદરતી ઉપચાર, સ્પોકન સંસ્કૃત, ઈન્ડિયન પોએટિક્સ, ગુજરાતમાં પંચાયતી રાજ જેવા વિષયોના સર્ટિફિકેટ અને ડિપ્લોમા અભ્યાસક્રમ પણ ચલાવવામાં આવે છે. અમે શહીદની વીરવધૂ અને એમનાં સંતાનોને, કેદીઓને નિઃશુલ્ક શિક્ષણ આપીએ છીએ. તૃતીયપંથી વિદ્યાર્થીઓને સ્કૉલરશિપ આપવાની વ્યવસ્થા પણ છે. અમારું ધ્યેય અને પ્રયાસ દેશના ખૂણેખાંચરે વસતા લોકોને નાત-જાતના ભેદભાવ વગર પોસાય એવું શિક્ષણ આપવાનો છે.

અમીબહેન ઉમેરે છે કે ‘નૅશનલ એસેસમેન્ટ ઍન્ડ એક્રેડિટેશન કાઉન્સિલ' (NAAC)માં A++ ગ્રેડ મેળવનારી બાબાસાહેબ આંબેડકર ઓપન યુનિવર્સિટી’ દેશની એકમાત્ર પ્રથમ સ્ટેટ ઓપન યુનિવર્સિટી છે. મૂલ્યાંકન માટેના ચોક્કસ માપદંડો છે. ગુજરાતની એકમાત્ર અમારી યુનિવર્સિટી છે, જેને A++નો ગ્રેડ મળ્યો હોય.