ફેબ્રિક જ્વેલરીએ આપ્યો જીવનને નવો નિખાર!

ફેશનેબલ માનુનીથી લઈને અભિનેત્રી પહેરે છે એ કાપડમાંથી બનતા દાગીનાની કળાકૃતિ બનાવનારી આ અમદાવાદી કન્યાનો જીવનપ્રવાસ રસપ્રદ છે.

- મોના શેઠ

ઘણીવાર એવું બને કે ગમે એટલું પ્લાનિંગ કરીએ, પણ નસીબમાં લખાયું હોય એમ જ થાય. બાળપણમાં અમુક-તમુક બનવાનાં કે ક્ષેત્રે કારકિર્દી ઘડવાનાં સપનાં જોયા બાદ પણ ધારેલી મંજિલ પર પહોંચાતું નથી.

બીજી બાજુ એવુંય બને કે કોઈ પ્લાનિંગ જ ન કર્યું હોય, કોઈ આકાંક્ષા સેવી ન હોય અને જીવનની દિશા આપોઆપ મળી જાય. બસ, આવું જ કંઈ બન્યું અમદાવાદની નિર્જરી શાહ સાથે. માત્ર કળા ક્ષેત્રમાં રુચિ હોવાને કારણે એને જીવનનું ધ્યેય સાંપડી ગયું. નિર્જરી જ્વેલરી ડિઝાઈનર છે. જો કે એના દાગીના જરા નોખા છે. એ ફેબ્રિક જ્વેલરી એટલે કે ટેક્સ્ટાઈલ-ફેબ્રિકમાંથી સસ્ટેનેબલ જ્વેલરી બનાવે છે. પર્યાવરણને નુકસાન ન થાય એ રીતે કુદરતી સાધન-સંપત્તિ અને શક્તિનો ઉપયોગ કરીને કોઈ ચીજ બને એને સસ્ટેનેબલ કહેવાય છે. બાય નિર્જરીની બ્રાન્ડ હેઠળ એની જ્વેલરી પહેરતા ચાહકોની સંખ્યા જોતજોતાંમાં બહુ વધી ગઈ છે. હમણાં રિલીઝ થયેલી અનિલ કપૂર પ્રોડક્શન્સની થેન્ક યુ ફૉર કમિંગ ફિલ્મમાં અભિનેત્રી ભૂમિ પેડણેકરે અમુક દશ્યોમાં નિર્જરીની જ્વેલરી પહેરી છે.

માત્ર નવ વર્ષમાં જ્વેલરી ડિઝાઈનર તરીકે સફળતા મેળવનારી નિર્જરી પ્રિયદર્શિનીને કહે છેઃ ‘અમદાવાદ મારી જન્મભૂમિ અને કર્મભૂમિ છે. મમ્મી ફૅશન ડિઝાઈનર અને પપ્પા ઈન્ટિરિયર ડિઝાઈનર. ટૂંકમાં, ઘરના વાતાવરણમાં જ કળા. હું સ્કૂલમાં હતી ત્યારે ભણવા કરતાં મને ડ્રોઈંગ ને ક્રાફ્ટમાં વધુ રસ પડે. ગણિત તો જરાય ન ગમે. ભણતાં ભણતાં ઘણા ક્લાસ ભરતી, એ પણ કોઈ ને કોઈ આર્ટ સંબંધિત. દસમા ધોરણ પછી કારકિર્દી નક્કી કરવાની વાત આવી ત્યારે કંઈ સૂઝ ન પડે. ઝાઝું કંઈ વિચાર્યા વિના મેં કૉમર્સ લઈ લીધું. કૉલેજમાં પણ ભણવાનું ઓછું ને ઈતર પ્રવૃત્તિમાં વધુ રસ. કૉલેજ ફેસ્ટિવલમાં મોડેલિંગ પણ કર્યું અને ડાન્સ શો પણ. કૉલેજકાળથી મમ્મીની મદદથી મારાં કપડાં હું જ ડિઝાઈન કરતી. જો કે ક્યારેય એવો વિચાર ન આવ્યો કે ફેશન ડિઝાઈનિંગ કરીશ.’