ગુજરાતમાં હવે ડૉગ પકડશે દારૂ!

ચોરી, લૂંટ કે મર્ડરની ઘટનાના આરોપી સુધી પહોંચવા પોલીસજવાનોની સાથે ડૉગ સ્ક્વૉડ જોવા મળે એ કોઈ નવી વાત નથી. દાયકાઓથી પોલીસતંત્ર શ્વાનને એવી તાલીમ આપે છે કે જે ગુનેગારના સગડ મેળવવામાં મદદરૂપ થાય છે. ગુજરાત પોલીસે હવે ડૉગને તાલીમ આપવામાં એક ડગલું આગળ વધીને ક્યાંય દારૂ સંતાડવામાં આવ્યો હોય એ શોધી શકે એ માટે ખાસ બે ‘આલ્કોહોલ ડિટેક્શન ડૉગ’ તૈયાર કર્યા છે.

- દેવેન્દ્ર જાની (રાજકોટ)

દિવાળીના દિવસોમાં જમ્મુ-કશ્મીરમાં આપણા લશ્કરનો ફૅન્ટમ નામનો એક એસોલ્ટ ડૉગ એક આતંકીની ગોળી વાગતાં મૃત્યુ પામ્યો. જમ્મુના અખનૂર વિસ્તારમાં કેટલાક આતંકી છુપાયા હોવાની માહિતીના આધારે સેનાના જવાનો એમને ઘેરી વળ્યા ત્યારે આતંકીઓએ અંધાધૂંધ ફાયરિંગ શરૂ કર્યું, જેમાં ફૅન્ટમનો ભોગ લેવાયો.

સરહદી વિસ્તારોમાં કેફી પદાર્થોની દાણચોરી પર નિયંત્રણ મેળવવા આપણાં સુરક્ષાદળો સ્નિફર ડૉગ રાખે છે. એ રીતે લશ્કર વિસ્ફોટકોની ભાળ મેળવવા અને પાછલાં કેટલાંક વર્ષોથી આતંકીઓ પર હુમલો કરવા માટે પણ ખાસ કેળવવામાં આવેલા શ્વાનોનો ઉપયોગ કરે છે. ફૅન્ટમ આવો જ એક એસોલ્ટ ડૉગ હતો.

તેજ ઘ્રાણેન્દ્રિય માટે જાણીતા શ્વાનોનો ઉપયોગ પોલીસ વિભાગ તો ખાસ્સા લાંબા સમયથી કરતો જ આવ્યો છે. હત્યા, લૂંટ, ચોરી જેવા કિસ્સામાં શ્વાનને ઘટનાસ્થળે લઈ જઈ આરોપીના સગડ મેળવવામાં એની આ શક્તિ કામે લગાડવામાં આવે છે. ગુજરાત પોલીસની વાત કરીએ તો એની ડૉગ સ્ક્વૉડમાં પણ અલગ અલગ ગુનાના ડિટેક્શન માટે ખાસ તાલીમ પામેલા ડૉગ છે. ગુજરાત પોલીસના અમદાવાદ-નરોડા ખાતેના ડૉગ ટ્રેનિંગ સેન્ટરમાં વિવિધ નસલના શ્વાનોને વિસ્ફોટક પદાર્થો, કેફી દ્રવ્યો, કોઈ સંદિગ્ધ શખસની શોધ, વગેરે ડિટેક્ટ કરવા માટે ટ્રેનિંગ આપવામાં આવે છે.