આજ એમના મંદિરિયામાં મહાલે શ્રીનાથજી

વૈષ્ણવજન તે આનું નામ: ગરીબ શ્રીજીભક્તોને નાથદ્વારાની જાત્રા કરાવવાનો સેવાયજ્ઞ જિજ્ઞેશ કાણકિયા, કનુભાઈ મહેતા અને નીલેશ સંઘવીએ છેલ્લાં ૧૧ વર્ષથી પ્રજ્વલિત રાખ્યો છે.

- સમીર પાલેજા (મુંબઈ)

આપણે દર મહિને આરામથી નાથદ્રારા પહોંચીને શ્રીનાથજીનાં દર્શન કરીએ છીએ, પણ એવા વૈષ્ણવોનું શું કે જે ઈચ્છા હોવા છતાં આર્થિક તંગીને કારણે વર્ષોનાં વર્ષો અહીં આવી શકતા નથી. હવે ઠાકોરજીની પ્રેરણા થઈ જ છે અને જો એ શક્તિ આપે તો આપણે સ્વખર્ચે વૈષ્ણવોની જાત્રા સ્પૉન્સર કરવી જોઈએ...

૨૦૧૪માં મુંબઈના સ્ટૉક બ્રોકર જિજ્ઞેશ કાણકિયા નાથદ્વારામાં દર્શનની ગિરદીમાં આગળ વધી રહ્યા હતા ત્યારે એમના મનમાં આવો વિચાર ચમકી ગયો. એમણે પડખે ઊભેલા પોતાના મોટા સાઢુભાઈ નીલેશ સંઘવી સમક્ષ હૃદય ખોલ્યું. નીલેશભાઈએ વિચાર વધાવી લીધો.