વેસ્ટર્ન ડિસ્ટર્બન્સની અસરથી બેવડી ઋતુનો અનુભવ

આગામી ત્રણ દિવસ વહેલી સવારે, રાતે ઠંડાગાર પવનો ફૂંકાશે

- 

સામાન્ય રીતે માર્ચ મહિનાના અંતિમ સપ્તાહમાં માથું ફાડી નાખે તેવી કાળઝાળ ગરમીનો અનુભવ થતો હોય છે, પરંતુ સક્રિય થયેલા મજબૂત વેસ્ટર્ન ડિસ્ટર્બન્સની અસરના કારણે અમદાવાદ સહિત રાજ્યભરના લોકો હાલ બેવડી ઋતુનો અનુભવ કરી રહ્યા છે. માર્ચ મહિનામાં એક પછી એક સક્રિય થઈ રહેલા વેસ્ટર્ન ડિસ્ટર્બન્સના લીધે હવામાનમાં સતત પલટા આવી રહ્યા છે. આટલું ઓછું હોય તેમ હવામાન વિભાગે આગામી દિવસોમાં અમદાવાદ સહિત રાજ્યના કેટલાક વિસ્તારોમાં વરસાદ પડવાની આગાહી પણ કરી છે. અમદાવાદ શહેરમાં છેલ્લા ૨૪ કલાક દરમિયાન મહત્તમ તાપમાન વધીને ૩૯.૭ ડિગ્રી સેલ્સિયસ પર પહોંચી ગયું છે, જે સામાન્ય કરતાં ત્રણ ડિગ્રી જેટલું વધુ છે. આજે સવારે શહેરમાં ૨૧.૫ ડિગ્રી સેલ્સિયસ લઘુતમ તાપમાન નોંધાયું હતું.