சமூகமயமாக்கலும் குழந்தைப் பருவமும்

குமாரசிங்கம் தனுஷா, 2ஆம் வருட கல்வியியல் சிறப்பு கற்கை மாணவி, கல்வி -பிள்ளை நலத்துறை, கிழக்கு பல்கலைக்கழகம்.

சமூக மயமாக்கலானது சமூகத்தின் விதிமுறைகள் சுருத்துக்கள் ஆகியவற்றை உள்வாங்கும் வழிமுறையைக் குறிக்கும். தமது பண்பாட்டைக் கற்றுக் கொள்வதற்கும் அதனைப் பின்பற்றி வாழ்வதற்கும் மனிதனுக்கு சமூக அனுபவம் தேவையாக உள்ளது. ஆகவே, சமூக மயமாக்கலே ஒவ்வொரு மனிதனது வாழ்க்கை முழுவதுமான சுற்றலின் வெளிப்பாடாக உள்ளது.

சமூக மயமாக்கலானது வாழ்நாள் முழுவதும் இடம்பெறுவதாகும். அதிலும் சமூக மயமாக்கல் ஒரு மனிதனின் குழந்தைப் பருவத்தில் இடம்பெறுவது அவனின் எதிர்காலத்தில் வாழப்போகும் வாழ்க்கைக்கும் சமூகத்தின் இருப்பிற்கும் பெரிதும் தாக்கம் புரியும்.

சமூகத்தின் வளர்ச்சியில் குடும்பம் என்பது அடிப்படை அலகு என்றே கூற வேண்டும். காரணம் குடும்பங்கள் பல ஒன்று சேர்ந்தே சமூகம் என்ற சுட்டமைப்பு உருவாகின்றது. எனவே, குடும்பத்தில் குழந்தைகள் என்பவர்கள் மற்றவர்களைச் சார்ந்து வாழ்வதோடு, மற்றவர்களின் தொடர்பு மூலமாகத்தான் சமூகத்திற்கு உள்நுழைகின்றார்கள்.

குழந்தைகள் குடும்பத்திலிருந்தே மற்றவர்களுடன் சேர்ந்து வாழுதல், பகிர்ந்து உண்ணுதல், குழு வாழ்க்கை முறை என்பவற்றை கற்றுக் கொள்கின்றார்கள். மேலும், இவை சமூகநிலை, மதம் மற்றும் இனம் என்பவற்றின் பிரதிபலிப்பே என்று கூறலாம்.