കുട്ടികളുടെ വിദ്യാഭ്യാസവും കർമ്മവിനകളും

പൊതുവേ കുട്ടികളുടെ ബാല്യകാലം മുതൽ കോളേജ് വിദ്യാഭ്യാസകാലം വരെ യാതൊരു തരത്തിലുള്ള ബുദ്ധിമുട്ടുകളും ഇല്ലാതിരിക്കണമെങ്കിൽ അവരുടെ ജാതകത്തിലെ മാതൃസ്ഥാനം, സുഖസ്ഥാനം എന്ന് പറയപ്പെടുന്ന നാലാം ഭാവവും പിതൃസ്ഥാനം, ഭാഗ്യ സ്ഥാനം എന്ന് പറയുന്ന ഒൻപതാം ഭാവവും ബലമുള്ളതായിരിക്കണം

- വിഷ്ണദാസൻ

ഇന്ന് മിക്ക മാതാപിതാക്കളുടെയും ആധി മക്കളുടെ വിദ്യാഭ്യാസത്തെക്കുറിച്ചാണ്. ഓരോ രക്ഷിതാക്കളും തങ്ങളുടെ കുട്ടികൾ പഠിച്ച് നല്ല നിലയിലെത്തണമെന്നാണ് ആഗ്രഹിക്കുന്നത്. എന്നാൽ കർമ്മവിനകളുടെ അടിസ്ഥാനത്തിൽ ഉണ്ടാവുന്ന ചില ബുദ്ധിമുട്ടുകളും തടസ്സങ്ങളും കുട്ടികളുടെ ജീവിതത്തിന്റെ ഗതി തന്നെ മാറ്റിമറിക്കുന്നു. ദുശ്ശീലങ്ങൾ, ദുഷ്ടസംസർഗ്ഗം എന്നിവ കുട്ടികളുടെ ജീവിതത്തിന്റെ ഗതി മാറ്റുന്നു. അവരെ എങ്ങനെ നേരായ മാർഗ്ഗത്തിലൂടെ നയിക്കണം എന്നറിയാതെ ചിന്താക്കുഴപ്പത്തിലും വിഷമത്തിലുമാവുന്നു. കുട്ടികൾ മുതൽ മുതിർന്നവർ വരെയുള്ള എല്ലാ ആളുകളേയും ജീവിതത്തെ ഏതോ ഒരു രീതിയിൽ നിയന്ത്രിക്കുന്നത് ഗ്രഹങ്ങളാണ്. കർമ്മവിനകൾക്കനുസൃതമായി ഗ്രഹങ്ങൾ നൽകുന്ന ഫലങ്ങൾ കാരണം കയറ്റിറക്കങ്ങളെ നേരിടേണ്ടതായി വരുന്നു. ഇത്തരം സന്ദർഭങ്ങളിൽ ജ്യോതിഷം മികച്ച വഴികാട്ടിയായി മാറുന്നു.

പൊതുവേ കുട്ടികളുടെ ബാല്യകാലം മുതൽ കോളേജ് വിദ്യാഭ്യാസകാലം വരെ യാതൊരു തരത്തിലുള്ള ബുദ്ധിമുട്ടുകളും ഇല്ലാതിരിക്കണമെങ്കിൽ അവരുടെ ജാതകത്തിലെ മാതൃസ്ഥാനം, സുഖസ്ഥാനം എന്ന് പറയപ്പെടുന്ന നാലാം ഭാവവും പിതൃസ്ഥാനം, ഭാഗ്യ സ്ഥാനം എന്ന് പറയുന്ന ഒൻപതാം ഭാവവും ബലമുള്ളതായിരിക്കണം. അതേസമയം അതാത് കാലഘട്ടങ്ങളിൽ നടക്കുന്ന ദശാസന്ധികളും നന്മേയേകുന്ന തരത്തിലായിരിക്കണം. ഇവയിൽ ഏതെങ്കിലും ഒന്നിന് എന്തെങ്കിലും തരത്തിലുള്ള കുറവുണ്ടെങ്കിൽ പലതരം തടസ്സങ്ങളും ബുദ്ധിമുട്ടുകളും നേരിടേണ്ടതായി വരും. ജാതകപ്രകാരം ഇതാണ് അവസ്ഥയെങ്കിൽ ഗോചരവശാൽ നടക്കുന്ന ശനി, വ്യാഴം(ഗുരു) രാഹുകേതുക്കൾ എന്നിവയുടെ പകർച്ചയും ചില പ്രശ്നങ്ങൾ സൃഷ്ടിക്കാം എന്നിരുന്നാലും നല്ല ജാതകമാണെങ്കിൽ ഗോചരഗ്രഹനില കൊണ്ട് വലിയ ദോഷങ്ങളൊന്നും ഉണ്ടാവുകയില്ല.