പ്രാക്ടിക്കലാകണം അല്പംകൂടി

ലയണൽ മെസ്സിയുടെ വിടവാങ്ങൽ പ്രതീക്ഷകൾ എത്രത്തോളമെന്ന് പരീക്ഷിക്കപ്പെടുക

- ആർ.ഗിരീഷ് കുമാർ [e-mail]

ഞങ്ങൾ ഫേവറിറ്റുകളാണോ എന്ന് എനിക്കറിയില്ല. ചോദിച്ചാൽ പക്ഷേ, അർജന്റീനയെ എക്കാലത്തും അങ്ങനെയാണ് കാണുന്നത്. ഞങ്ങൾ ഫേവറിറ്റുകളല്ലെന്ന് എനിക്കറിയാം. ഞങ്ങളെക്കാൾ മികച്ച ടീമുകൾ ലോകകപ്പിലുണ്ട് ഖത്തറിലെത് തന്റെ അവസാന ലോകകപ്പാകും എന്നുറപ്പിച്ചു പറഞ്ഞശേഷം ലയണൽ മെസ്സി സംശയത്തിന്റെ ആനുകൂല്യത്തോടെ പറഞ്ഞ വാക്കുകളാണിവ.

അർജന്റീനയെക്കാൾ മികച്ച ടീമുകൾ ഖത്തറിലുണ്ടെന്ന യാഥാർഥ്യം അംഗീകരിക്കാൻ മെസ്സിക്ക് മടിയില്ല. ഇതൊരു തിരിച്ചറിവാണ്.

പക്വത നേടിയ മെസ്സി

പ്രതീക്ഷകളുടെ അമിത ഭാരമേറി മറ്റൊരു ലോകകപ്പിനെത്താൻ മെസ്സി തയ്യാറല്ല. മുപ്പത്തഞ്ചുവയസ്സിനിടെ, പതിനാറുവർഷത്തോളം ലോകകപ്പെന്ന സ്വപ്നം പേറി ആ കളിക്കളത്തിൽ പറന്നു നടന്നയാളാണത്. കൗമാരപ്രായത്തിൽ കണ്ടുതുടങ്ങിയ സ്വപ്നത്തെ മധ്യവയസ്സിന്റെ പക്വതയോടെ ഉൾക്കൊള്ളാൻ അയാൾ പഠിച്ചിരിക്കുന്നു. 2014-ലെ ബ്രസീൽ ലോകകപ്പിൽ കിരീടം കൈയിൽ നിന്ന് വഴുതിപ്പോകുന്നത് നിസ്സഹായനായി കണ്ടുനിന്നയാളാണത്. അന്ന് വാർത്ത കണ്ണുനീർ മെസ്സിയെ പലതും പഠിപ്പിച്ചിട്ടുണ്ട്. ലോകകപ്പ് നേടുമെന്ന് ഉറപ്പിച്ചുപറയാൻ ഇപ്പോൾ അദ്ദേഹത്തെ അനുവദിക്കാത്തതും ആ കണ്ണുനീർ തന്നെ.

ആരാധകരും പഠിച്ചു തുടങ്ങിയിരിക്കുന്നു. ഒരുവേള, മെസ്സി ലോകകപ്പ് നേടാതെ ഫുട്ബോളിൽ നിന്ന് വിരമിച്ചാൽപ്പോലും അത് ആരാധകർക്ക് താങ്ങാനാവാത്ത മുറിവായി മാറില്ല. അവരത് ഉൾക്കൊണ്ടു കഴിഞ്ഞിരിക്കുന്നു. 1986-ൽ മെക്സിക്കോയിൽ അർജന്റീന കപ്പ് നേടുമെന്ന് ആരും കരുതിയിരുന്നില്ല. ആ ലോകകപ്പ് മറ്റ് പല താരവാഴ്ചകളാണ് കാത്തിരുന്നത്. കാൾ ഹെയ്ൻസ് റുമനിഗെയും മിഷേൽ പ്ലാറ്റിനിയും എൻസോ ഫ്രാൻസെസ്കോലിയുമൊക്കെയായിരുന്നു വാഴ്ത്തുപാട്ടുകളിൽ മുന്നിട്ടു നിന്നത്. എന്നാൽ, കുറിയ കാലുകൾ നിറയെ ത്രസിക്കുന്ന പേശികളുമായെത്തിയ മാറഡോണ കളം മാറ്റിമറിച്ചു.