குதூகலம் தரும் கொலு!

இந்துக்கள் கொண்டாடும் விழாக்களில் முக்கியமானது கொலு என்பது மறக்க முடியாதது.

- ஆர். சக்தி

கொலு என்றால் அழகு என்று பொருள்படும் அந்த வகையில் நவராத்திரியை முன்னிட்டு பொம்மைகளை வைத்து செய்யப்படும் ஒரு வழிபாட்டு முறைதான் இந்த கொலு பண்டிகை யாகும். பெரும்பாலும் இந்தியாவின் தென்பகுதிகளான தமிழ்நாடு, கேரளா, ஆந்திரப் பிரதேசம் மற்றும் கர்நாடகம் பகுதிகளில் இவ்வழிபாடு சிறப்பாக கொண்டாடப்பட்டு வருகிறது.

மனிதன் படிப்படியாக தன் ஆன்மிக சிந்தனைகளை வளர்த்து, இறுதியாக இறைவனுடன் கலக்க வேண்டும் என்ற தத்துவத்தை உணர்த்துவதற்காகவே, கொலுவில் படிகள் அமைக்கப்பட்டு, அதில் பொம்மைகள் அடுக்கி வைக்கப்படுகின்றன. ஒன்பது படிகள் அமைப்பது மரபு. அனைவரும் ஒன்று கூடிக் கொண்டாடுவது திருவிழாவாகும். பல்வேறு கலாச்சாரங்களை உள்ளடக்கியது தான் இந்தியா. ஒவ்வொரு பகுதியிலும் வாழும் மக்கள் அவர்களுக்கு ஏற்றவாறு பல பண்டிகைகளைக் கொண்டாடி வருகின்றனர். ஆனால் சில பண்டிகைகள் மட்டுமே நாடு முழுவதும் கொண்டாடப்படுகிறது.

கொலுவில் 9 படிகள்

நவராத்திரி பண்டிகை ஆண்டு தோறும் மகாளய அமாவாசைக்கு மறுநாள் தொடங்கும். பிரதமை தொடங்கி தசமி வரை 10 நாட்கள் பண்டிகை கொண்டாடப் படும். நவராத்திரி விழாவை கொலு வைத்து கொண்டாடுவது மரபு. நவராத்திரியன்று, பெண்கள் வீடுகளில் கொலு வைத்து, விரதம் இருந்து, அம்மனை வழிபட்டால் நன்மை கிடைக்கும் என்பது ஐதீகம். நவராத்திரி நாளில் ஐம்பூதங்களில் ஒன்றான மண்ணினால் செய்யப்பட்ட பொம்மைகளை சக்தியின் அம்சங்களாக எண்ணி நவராத்திரியில் பூசிப்பவர்களிற்கு சகல நலன்களும் கிடைக்கும் என்பது மக்களின் நம்பிக்கை.