தங்க கடத்தல் ...

தங்கத்தின் விலை ராக்கெட் வேகத்தில் எகிறிக் கொண்டிருக்கும் இன்றைய சூழலில்... 'அயன்' பட சூர்யா போல அலட்டிக் கொள்ளாமல் தங்க கடத்தலில் ஈடுபட்ட நடிகை ரன்யா ராவ், இப்போது 'நான் ஒரு அப்பாவி, என்னை திட்டம் போட்டு மாட்டி விட்டுட்டாங்க' என்று நீதிமன்றத்தில் அழுது புலம்பிக் கொண்டு இருக்கிறார்.

- 

கன்னட சினிமாவில் நடிகர் கிச்சா சுதீப்புக்கு ஜோடியாக 'மாணிக்யா' என்ற படத்தில் நடித்து புகழ் பெற்றவர் நடிகை ரன்யா ராவ். தமிழில் விக்ரம் பிரபுவுக்கு ஜோடியாக வாகா படத்திலும் நடித்திருக்கிறார்.தற்போது 34 வயதாகும் ரன்யா, சினிமா வாய்ப்பு இல்லாத நிலையில், அடிக்கடி ரீல்ஸ் போட்டு இன்ஸ்டாவில் இருப்பைக் காட்டி வந்தார்.

நடிகை ரன்யாவின் வளர்ப்புத் தந்தை கர்நாடக மாநில போலீஸ் குடியிருப்பு மற்றும் உள்கட்டமைப்பு வளர்ச்சி கழக ஏ.டி.ஜி.பி.யான ராமச்சந்திர ராவ். அதாவது ராமச்சந்திர ராவின் இரண்டாவது மனைவியுடைய முதல் கணவருக்கு பிறந்தவர் நடிகை ரன்யா.

நான்கு மாதங்களுக்கு முன்பு தான் நடிகை ரன்யா, ஜதின் ஹுக்கேரி என்ற கட்டிடக் கலை நிபுணரை திருமணம் செய்து கொண்டார். திருமணம் பெங்களூரில் உள்ள பிரபலமான ஓட்டல் தாஜ் வெஸ்ட் எண்டில் நடந்தாலும் அதுவும் ஒரு ரகசிய கல்யாணம் போலத்தான் நடந்திருக்கிறது.

ஜதின் ஹுக்கேரி கர்நாடகாவைச் சேர்ந்த பிரபல அரசியல்வாதியின் சொந்தக்காரரும் கூட. மார்ச் 3-ஆம் தேதி அன்று வழக்கம் போல நடிகை ரன்யா, துபாயில் இருந்து பிளைட் மூலம் பெங்களூர் கெம்பே கவுடா விமான நிலையத்தில் வந்திறங்குகிறார். விமான நிலைய வாயிலில் பசவராஜ் என்ற போலீஸ்காரர், ரான்யாவின் வருகைக்காக காத்திருந்து, அவரை அழைத்துக் கொண்டு போகிறார்.

'அட, நம்ம ஏ.டி.ஜி.பி. சாரோட பொண்ணுங்க...' என்று சொன்னதும், விமான நிலையத்தில் நடக்கும் வழக்கமான சோதனை கூட இல்லாமல் அதிகாரிகள் நடிகையை தனி வாயிலில் அனுப்பி வைக்கின்றனர். கடைசி இரண்டு அடி எடுத்து வைத்திருந்தால் ரன்யா, நுழைவாயிலைக் கடந்து வெளியே சென்றிருப்பார். ஆனால் ஏற்கனவே அங்கு காத்துக் கொண்டிருந்த டெல்லியில் இருந்து வந்த டி.ஆர்.ஓ அதிகாரிகள் ரன்யாவை சூழ்ந்து கொள்கின்றனர்.