மகிழ்ச்சி நிறைந்த கொல்கத்தா நகரம்!

கொல்கத்தா என்றாலே காளிகாட் காளிகோவில், டிராம் ரெயில் நினைவுக்கு வரும்.

- திவ்யமீனா

கொல்கத்தா என்றாலே காளிகாட் காளிகோவில், டிராம் ரெயில் நினைவுக்கு வரும். கொல்கத்தாவிற்கு சுற்றுலா செல்கையில், சுந்தரவனம் உயிர்க்கோளக் காப்பகமும் (Sundarbans National Park) பார்க்க வேண்டியது அவசியம்.

இந்தியாவின் மேற்கு வங்காள மாநிலத்தின் தெற்கு 24 பர்கனா மாவட்டத்தில் அமைந்துள்ள உயிர்க்கோளக் காப்பகம். கல்கத்தாவிலிருந்து தென்கிழக்குத்திசையில் 100 கிலோமீட்டர் தொலைவில் அமைந்து உள்ளது. உலகளவில் பெரும்பரப்பளவில் காணப்படும் சதுப்புநிலக்காடுகளைக் கொண்ட சுந்தரவனம், யுனெஸ்கோவின் மனிதனும் உயிர்க்கோளமும் (MAB) என்ற திட்டத்தின் கீழ் 1989ஆம் ஆண்டு உயிர்க்கோளக் காப்பகமாகவும், உலக பாரம்பரியக் களமாகவும் அறிவிக்கப்பட்டு உள்ளது.

தென் கொல்கத்தாவில் கங்கையின் கழிமுகத்தில் காணப்படும் இதன் பரப்பளவு, 9630 ச.கி.மீட்டராகும். உலகளவில் புலிகளுக்கு உறைவிடம் தரும் மிகப்பெரிய சதுப்புநிலகாடுகள் இக்காப்பகத்தில் மட்டும் காணப்படுகிறது. வங்காளப்புலி காப்புப்பகுதி, சுந்தரவனம் தேசியப்பூங்கா ஆகியன இதன் மையமண்டலத்தில் அமைந்து உள்ளன. மேலும் சச்னேகாலி வனவிலங்கு சரணாலயம், லோத்தியன் தீவு வனவிலங்கு சரணாலயம் மற்றும் ஹாலிடே தீவு வனவிலங்கு சரணாலயம் ஆகிய மூன்று சரணாலயங்களும் இக்காப்பகத்தினுள் உள்ளன. பார்க்க இரண்டு நாட்கள் தேவைப்படும். சுற்றுலா பேக்கேஜ் வழியாகவும் செல்லலாம்.

எந்த மாநிலத்திலும் இல்லாத டிராம் ரெயில் பயணம் மேற்கொள்ள கொல்கத்தா வரும் ரெயில் பயணிகள் விரும்புகின்றனர்.