പപ്പുവ ന്യൂഗിനിയിലെ ഭാഷകൾ

മനുഷ്യരൊഴികെയുള്ള മറ്റു ജീവജാലങ്ങൾ പരസ്പരം ആശയ വിനിമയം നടത്താറുണ്ടോ? ഉണ്ടെങ്കിൽ എങ്ങനെയായിരിക്കും അത്? അപകടസാധ്യത അറിയിക്കുന്നതിന്, ഇണചേരുന്നതിന്, ഭക്ഷണസാന്നിധ്യം അറിയിക്കുന്നതിന്, വികാരങ്ങൾ പ്രകടിപ്പിക്കുന്നതിന് ... ഇതിനെല്ലാം ജീവികൾ പലതരം ചലനങ്ങളും ശബ്ദങ്ങളും ഉപയോഗിക്കാറുണ്ട്. എന്നാൽ മനുഷ്യരുടെ ഏറ്റവും പ്രധാനപ്പെട്ട ആശയ വിനിമയ ഉപാധി ഭാഷ തന്നെയാണ്.

- കിരൺ ജെ.

ഭാഷകളില്ലാത്ത ഒരു ലോകത്തെക്കുറിച്ച് ഒന്ന് ആലോചിച്ചു നോക്കൂ. പരസ്പരം ആരും മിണ്ടാതെ നടക്കുന്ന ഒരു ലോകം.

അങ്ങനെ ഒരു ലോകമില്ല, അല്ലേ? സംസാരശേഷി ഇല്ലാത്തവരും ആംഗ്യഭാഷ ഉപയോഗിക്കുന്നുണ്ട്. ലിപിയില്ലാതെ സംസാരഭാഷയായി മാത്രം നിലനില്ക്കുന്ന ഭാഷകളും ഉണ്ട്, കേട്ടോ. നമ്മുടെ കൊങ്കിണി ഭാഷയ്ക്ക് മുൻകാലങ്ങളിൽ ലിപി തീരെ ഉണ്ടായിരുന്നില്ല.

ലോകത്ത് ഏകദേശം എത്ര ഭാഷകളുടെന്ന് കൂട്ടുകാർക്കറിയാമോ? ഏഴായിരത്തിലധികം ഭാഷകൾ ഉണ്ട്. എന്നാൽ ലോകജനസംഖ്യയുടെ പകുതിയും സംസാരിക്കുന്നത് ഇരുപത്തിമൂന്ന് ഭാഷകൾ മാത്രമാണ്. നിലവിൽ നാം സംസാരിക്കുന്ന ഭാഷകളിൽ തൊണ്ണൂറു ശതമാനവും 2050 ഓടെ ഇല്ലാതാകുമെന്ന് കരുതപ്പെടുന്നു.

ഇന്ന് ലോകത്തിൽ ഏറ്റവും കൂടുതൽ ആളുകൾ സംസാരിക്കുന്ന ഭാഷ ചൈനീസാണ്. മൻഡാരിൻ ഭാഷ എന്നാണ് ഇതറിയപ്പെടുന്നത്.