കടലോളം കടൽ മാത്രം

ജൂൺ 8 : ലോകസമുദ്ര ദിനം

- ശാന്തി കൃഷ്ണൻ എസ്.

കൂട്ടുകാർ കടൽ കണ്ടിട്ടുണ്ടോ? ബീച്ചിൽ പോയി തിരമാലകളെ പറ്റിച്ച് ഓടിക്കളിച്ചിട്ടുണ്ടോ? സൂര്യൻ ചുമപ്പ് ഓറഞ്ച് നിറത്തിൽ കടലിന്റെ അങ്ങേയറ്റത്ത് ചക്രവാളത്തിലേക്ക് മുങ്ങുന്നത് കണ്ടിട്ടുണ്ടോ? ഒത്തിരി അത്ഭുതങ്ങൾ ചെപ്പിലൊളിച്ചു വച്ചിട്ടുണ്ട് ഓരോ കടലും. ഒരുപക്ഷേ കരയേക്കാൾ ഒത്തിരി വലിയ ഒരു പ്രപഞ്ചം കടലിലുണ്ടെന്നു പറഞ്ഞാൽ കൂട്ടുകാർ വിശ്വസിക്കുമോ? ഭൂമിയെ ശൂന്യാകാശത്തുനിന്നും നോക്കുമ്പോൾ ഒരു നീല മുത്തായി കാണുന്നത് തന്നെ ഈ കടലിലെ വെള്ളം കൊണ്ടാണ്. കാരണം ഭൂമിയുടെ ഉപരിതലത്തിന്റെ 70% വും സമുദ്രമാണ്. മാത്രമല്ല ഭൂമിയിലെ മുഴുവൻ ജലത്തിന്റെയും കണക്കെടുത്താൽ 97% വും സമുദ്രങ്ങളിലാണ് ഉള്ളത്.

ഈ വെള്ളം ഇത്...

കടലു കണ്ടാൽ ഏതൊരു കുട്ടിക്കുറുമ്പനും ഉള്ളിൽ ആദ്യ ചോദ്യം വിരിയും. കടലിലാരാ വെള്ളം നിറച്ചേ? ചോദ്യം നിസ്സാരമല്ല. ഇതിനെപ്പറ്റി ശാസ്ത്രജ്ഞർ ഇപ്പോഴും പഠനം നടത്തി വരുന്നതേ ഉള്ളു. ഒരു കൂട്ടർ പറയുന്നത് വാല്നക്ഷത്രങ്ങളിൽ നിന്നാണ് ഇക്കണ്ട ജലമെല്ലാം ഇവിടെ വന്നത്. വാലനക്ഷത്രങ്ങളുടെ പ്രധാന ഭാഗവും ഐസ് രൂപത്തിലുള്ള വെള്ളമാണ്. മറ്റൊരു കൂട്ടർ പറയുന്നത് ഭൂമിയുടെ ആരംഭഘട്ടത്തിൽ തന്നെ ജലതന്മാത്രകൾ ഉണ്ടായിരുന്നു എന്നാണ്.

ഉപ്പുപ്പേ..