സമ്മാനം ഉലക്ക

കഥക്കൂട്ട്

- തോമസ് ജേക്കബ്

എല്ലാ സമ്മാനങ്ങൾക്കുമുണ്ടാവും, സമ്മാനം പോലെ സൂക്ഷിക്കേണ്ട ഒരു കഥയും.

മുംബൈയിൽ തൃപ്തികരമായ ഒരു ജോലി ലഭിച്ചപ്പോൾ പ്രശസ്ത പത്രാധിപർ പോത്തൻ ജോസഫ് കുറെ നാളത്തേക്ക് മാതാപിതാക്കളെ അവിടേക്കു കൂട്ടിക്കൊണ്ടുപോയി. പിതാവ് സി.ഐ. ജോസഫിന് വായിക്കാൻ പുസ്തകങ്ങൾ വാങ്ങിവച്ചു. അമ്മ സാറാമ്മയ്ക്ക് ഒരു വെള്ളിപ്പെട്ടിയും അതിൽ നൂറു രൂപയ്ക്കുള്ള രണ്ടു രൂപാ നാണയങ്ങളും. സാറാമ്മ ആദ്യം ചെയ്തത് തുട്ടുകൾ എണ്ണിനോക്കുകയായിരുന്നു. ഒരു നാണയം കുറവുണ്ടെന്ന് അവർ കണ്ടുപിടിച്ചു. അമ്മയുടെ പിശുക്കിനെപ്പറ്റി അറിയാമായിരുന്ന പോത്തൻ ഉടൻ തന്നെ ഒരു നാണയം കൂടി സംഘടിപ്പിച്ചു കൊടുത്തു. അമ്മയ്ക്കു പെരുത്ത സന്തോഷമായി.

എണ്ണം തികയാതിരുന്നതിന്റെ ഒരു ഗു ണഭോക്താവാണ് ഡോ. അകവൂർ നാരായണൻ. തിരുവിതാംകൂറിലെ മുറജപത്തിന് കാർമികനായി കൊച്ചിയിലെയും മലബാറിലെയും നമ്പൂതിരിമാർ എത്തുന്ന കാലമായിരുന്നു അത്. ചെല്ലും ചെലവും നൽകി ഇവരെ കൂട്ടിക്കൊണ്ടു ചെല്ലാൻ എല്ലാ കൊല്ലവും രാജസേവകർ എത്തുമായിരുന്നു. അക്കൊല്ലം അകവൂർ മനയിലെ വാസുദേവൻ നമ്പൂതിരിപ്പാടിനൊപ്പം ആറുവയസ്സുകാരൻ നാരായണനും മുറജപത്തിനായി പോയി.