എതുക്കും കുലുങ്ങാത്ത തലൈവി

2018 ലെ ഫേസ്ബുക്കിന്റെ ലിസ്റ്റിൽ ഇടം പിടിച്ച ഏക തെന്നിന്ത്യൻ നായികയാണ് നയൻതാര.

- പി.ജി.എസ്. സൂരജ്

ആരേയും അമ്പരപ്പിക്കുന്ന വളർച്ചയിലൂടെയാണ് തെന്നിന്ത്യയിലെ ലേഡി സൂപ്പർസ്റ്റാർ നയൻതാരയുടെ യാത്ര. തൊട്ടതെല്ലാം പൊന്നാക്കിയ ഈ തിരുവല്ലക്കാരി ഇപ്പോൾ തന്റെ ഏറ്റവും വലിയ രണ്ട് സ്വപ്നങ്ങൾ സാക്ഷാത്ക്കരിച്ച സന്തോഷത്തിലാണ്. ഷാരൂഖ് ഖാന്റെ നായിക എന്ന എക്കാലത്തെയും വലിയ തന്റെ സ്വപ്നമാണ് ജവാൻ എന്ന ചിത്രത്തിലൂടെ നയൻസ് സാക്ഷാത്ക്കരിച്ചത്. ആയിരം കോടിയാണ് ജവാന്റെ കളക്ഷൻ. കഴിഞ്ഞ കുറേവർഷങ്ങളുടെ ശ്രമഫലമായി സൗന്ദര്യ വർദ്ധക വസ്തുക്കളുടെ സ്വന്തം ബ്രാന്റ് ആരംഭിച്ചതായിരുന്നു നയൻസിന്റെ രണ്ടാമത്തെ സ്വപ്നം. ഈ 38-ാം വയസ്സിലും കൂടെയുള്ള മറ്റ് നായികമാരെയെല്ലാം അത്ഭുതപ്പെടുത്തുന്ന വളർച്ച നയൻസ് സ്വന്തമാക്കിയത് കഠിനാദ്ധ്വാനത്തിലൂടെ മാത്രമാണ്. നയൻസിന്റെ ഈ ഉദ്യമങ്ങൾക്കെല്ലാം പൂർണ്ണ പിന്തുണയേകി പ്രിയ പാതി വിക്കി കൂടെത്തന്നെയുണ്ട്(വിസ്നേശ് ശിവൻ).

2018 ലെ ഫേസ്ബുക്കിന്റെ ലിസ്റ്റിൽ ഇടം പിടിച്ച ഏക തെന്നിന്ത്യൻ നായികയാണ് നയൻതാര.

നായകന്മാരുടെ കഥകൾ മാത്രം പറഞ്ഞ് വാഴ്ത്തിപ്പാടുന്ന തമിഴ് സിനിമാലോകത്തേക്കാണ് നയൻതാരയുടെ കടന്നുവരവ്. തമിഴ് സിനിമയുടെ ചരിത്രത്തിലാദ്യമായി തീയേറ്റർ പരിസരത്ത് നയൻതാരയുടെ പടു കൂറ്റൻ കട്ട് ഔട്ടറുകൾ ഉയർന്നു. സൂപ്പർ താരങ്ങളെപ്പോലും കടത്തിവെട്ടി ഒരു നായിക ഒറ്റയ്ക്ക് വിചാരിച്ചാലും സിനിമകൾ വിജയിപ്പിക്കാം എന്ന് ഇന്ത്യൻ സിനിമാലോകത്തിന് കാണിച്ചുകൊടുത്ത താരമാണ് നയൻതാര. നയൻതാരയ്ക്ക് മാത്രം ലഭിച്ച ഈ താരപദവിക്ക് മുന്നിൽ വിവാദങ്ങൾക്കും പ്രതിഷേധങ്ങൾക്കും മുന്നിൽ തളരാതെ നിന്ന് പോരാടിയ ഒരു പെൺപോരാളിയുടെ കഥ കൂടിയുണ്ട്.