ലൈംഗികാരോഗ്യം ആയുർവേദത്തിൽ

ജീവിതത്തെ താങ്ങിനിർത്തുന്ന മൂന്ന് തൂണുകളായ ആഹാരം, നിദ്ര, മൈഥുനം എന്നിവയ്ക്ക് തുല്യ പ്രാധാന്യമാണ് ആയുർവേദം കല്പിച്ചിട്ടുള്ളത്. ജീവിതത്തിൽ ആഹാരത്തിനും ഉറക്കത്തിനുമുള്ള പ്രാധാന്യം ലൈംഗികതയ്ക്കും ആയുർവേദം നൽകിയിട്ടുണ്ട്

- ഡോ.എസ്.ഗോപകുമാർ മെഡിക്കൽസൂപ്രണ്ട് ഗവ. ആയുർവേദ കോളേജ് പരിയാരം, കണ്ണൂർ

ശാരീരികവും മാനസികവും സാമൂഹികവുമായ സമതുലിതാവസ്ഥയെയാണ് ആരോഗ്യം എന്ന് പൊതുവേ പറയുന്നത്. അത് കേവലം രോഗമില്ലാത്ത അവസ്ഥയല്ല എന്ന് അർഥം. സംതൃപ്തമായ ജീവിതത്തിന്റെ ഉത്പന്നങ്ങളാണ് ആനന്ദവും ആരോഗ്യവും. അതുകൊണ്ട് ആരോഗ്യവുമായി ബന്ധപ്പെടുത്തിയാണ് ലൈംഗിക ആരോഗ്യത്തെക്കുറിച്ചുള്ള ചർച്ചകളും നടത്തേണ്ടത്.

ആരോഗ്യത്തിന്റെ ഏറ്റവും പ്രധാനപ്പെട്ട ഘടകങ്ങളിൽ ഒന്നായി ലൈംഗികാരോഗ്യത്തെ ആയുർവേദം പരാമർശി ച്ചിട്ടുണ്ട്. ജീവിതത്തെ താങ്ങി നിർത്തുന്ന മൂന്ന് തൂണുകളായ ആഹാരം, നിദ്ര, മൈഥുനം എന്നിവയ്ക്കു തുല്യപ്രാധാന്യമാണ് ആയുർവേദം കല്പിച്ചിട്ടുള്ളത്. നമ്മുടെ ജീവിതത്തിൽ ആഹാരത്തിനും ഉറക്കത്തിനും എത്രത്തോളം പ്രാധാന്യമുണ്ടോ അത്രതന്നെ ലൈംഗികജീവിതത്തിനും ആയുർവേദം പ്രധാന്യം നൽകിയിട്ടുണ്ട്.

എന്നാൽ പുതിയ ജീവിതസാഹചര്യങ്ങളിൽ ലൈംഗികജീവിതത്തിൽ പ്രശ്നങ്ങൾ നേരിടുന്നവരുടെ എണ്ണം വർധിക്കുന്നുണ്ട്. സ്ത്രീകളിലും പുരുഷന്മാരിലും ഒരുപോലെ ഇത്തരം പ്രശ്നങ്ങൾ നിലനിൽക്കുന്നുമുണ്ട്.

കേവലം ഒരു ശരീരധർമത്തിനപ്പുറത്തേക്ക് ലൈംഗിക ബന്ധം സന്തോനോത്പാദന കർമത്തിന്റെ കൂടി ഭാഗമാണ്. നല്ല ലൈംഗികസംസ്കാരം എന്നാൽ മികച്ച പ്രത്യുത്പാദന വ്യവസ്ഥയിലേക്കു കൂടി വിരൽ ചൂണ്ടുന്നുണ്ട്. അതുകൊണ്ട് ലൈംഗികാ രോഗ്യത്തെ മൂന്നുതരത്തിൽ വിലയിരുത്താം. സംതൃപ്തമായ ലൈംഗിക ബന്ധം, നല്ല പ്രത്യുത്പാദന വ്യവസ്ഥ നിലനിർത്തുക, ലൈംഗികരോഗങ്ങളിൽ നിന്നുള്ള പ്രതിരോധം തീർക്കുക. ഈ കാര്യങ്ങളെ ചേർത്തു വേണം ലൈംഗികാരോഗ്യത്തെ വിലയിരുത്താൻ. അതുകൊണ്ട് മിഥ്യാധാരണകളിൽ പെട്ടുപോകാതെ ലൈംഗികാരോഗ്യത്തെക്കുറിച്ചുള്ള ശരിയായ അറിവുകൾ നേടുകയാണ് വേണ്ടത്.

സ്വാധീനിക്കും പല കാര്യങ്ങൾ

ഒരു വ്യക്തിയുടെ പൊതുവായ ആരോഗ്യത്തിൽ സംഭവിക്കുന്ന ഏത് ന്യൂനതയും ലൈംഗികാരോഗ്യത്തെയും ദോഷകരമായി ബാധിക്കാം. പ്രമേഹം, ഹൃദ്രോഗം, അമിത രക്തസമ്മർദം, രക്ത ക്കുഴലുകളെ ബാധിക്കുന്ന അസുഖങ്ങൾ തുടങ്ങിയവയെല്ലാം പലപ്പോഴും ലൈംഗികാരോഗ്യത്തെ ബാധിക്കാറുണ്ട്.

ശാരീരിക രോഗങ്ങൾക്ക് പുറമേ മാനസിക സംഘർഷങ്ങളും ലൈംഗികാരോഗ്യത്തെ തകരാറിലാക്കും. പങ്കാളിയുടെ കാര്യത്തിലും ഇത് പ്രസക്തമാണ്. പങ്കാളിക്ക് ഉണ്ടാകുന്ന മാനസിക സംഘർഷങ്ങളും ആനന്ദകരമായ ലൈംഗികജീവിതത്തെ വിരസതയിലേക്ക് തള്ളിവിടും. അതുകൊണ്ട് രണ്ടു പേരുടെയും മാനസിക നില ഒരേ പോലെ പരിഗണിക്കേണ്ടതുണ്ട്.