ടാറ്റു ചെയ്യുമ്പോൾ

ടാറ്റൂ ചെയ്യാൻ ആഗ്രഹിക്കുന്നവർ അറിയേണ്ട ആരോഗ്യകാര്യങ്ങൾ

- ഡോ.സൗമ്യ ജഗദീശൻ

ഒരു ഇലക്ട്രിക് ഉപകരണത്തിന്റെ സൂചിയുപയോഗിച്ച് ചർമത്തിലേക്ക് മഷി തുടർച്ചയായി കുത്തിവെച്ചാണ്  ടാറ്റുചെയ്യുന്നത് പച്ചകുത്തൽ). ചർമത്തിന്റെ ഡെർമിസ് എന്ന പാളിയിലേക്കാണ് ഈ മഷി എത്തിച്ചേരുന്നത്. ടാറ്റു കൂടുതലും പെർമനന്റായിരിക്കും. അതിനാൽ പെട്ടെന്ന് ഇത് ചർമത്തിൽനിന്ന് നീക്കം ചെയ്യാൻ സാധിച്ചേക്കില്ല. സമയമെടുത്ത് ചെയ്യേണ്ട കാര്യമാണിത്. അതുപോലെ, പൂർണഫലവും പ്രതീക്ഷിക്കാനാവില്ല.

സൈനികസേവനം പോലെയുള്ള ചിലതരം ജോലികൾക്ക് ടാറ്റു ശരീരത്തിൽ പാടില്ല എന്ന നിബന്ധനയുണ്ട്. അതിനാൽ അത്തരം ജോലികൾക്ക് ശ്രമിക്കുന്നവർ ടാറ്റുചെയ്യുന്നത് ഒഴിവാക്കുന്നതായിരിക്കും നല്ലത്. ടാറ്റു നീക്കം ചെയ്യൽ അത്ര എളുപ്പമല്ലെന്നതാണ് ഇതിന് കാരണം.

ശ്രദ്ധിക്കേണ്ട കാര്യങ്ങൾ

 ടാറ്റു ചെയ്യാനുപയോഗിക്കുന്ന മഷി അലർജിക്കിടയാക്കാറുണ്ട്. അതിനാൽ ആദ്യം ഒരു ടെസ്റ്റ് ഡോസെ ടുക്കണം. അതിൽ കുഴപ്പമില്ലെങ്കിൽ മാത്രമേ ടാറ്റു ചെയ്യാവൂ.

ടാറ്റുവിനും ചില പാർശ്വ ഫലങ്ങളുണ്ട്. ചിലർക്ക് ടാറ്റു ചെയ്ത ഭാഗത്ത് അണുബാധയുണ്ടാകാം. പനി, ടാറ്റുചെയ്ത ഭാഗത്ത് വേദന, ചുവന്നു തടിക്കുക തുടങ്ങിയ ലക്ഷണങ്ങൾ അണുബാധയുടെതാണ്.

അംഗീകാരമുള്ള, പ്രൊഫഷണലായ ഒരാളെക്കൊണ്ടു മാത്രമേ ടാറ്റുചെയ്യിക്കാവു. എഫ്.ഡി.എ. അംഗീകാരമുള്ള മഷിയായിരിക്കണം ഉപയോഗിക്കേണ്ടത്.

അണുവിമുക്തമല്ലാത്ത സൂചിയും മറ്റുപകരണങ്ങളും കൊണ്ട് ടാറ്റു ചെയ്യുന്നത് അണുബാധകൾക്കിടയാക്കാം.