മഹാമാരി തടയാൻ പുതിയ സംരംഭങ്ങൾ

കോവിഡ് അനുഭവങ്ങളുടെ പശ്ചാത്തലത്തിൽ മഹാമാരികളുടെ പ്രതിരോധത്തിന് കൂടുതൽ കൂട്ടായ്മകൾ രൂപവത്കരിക്കപ്പെടേണ്ടതിന്റെ ആവശ്യകത ഇപ്പോൾ ഉയർന്നുവരുന്നുണ്ട്

- ഡോ.ബി. ഇക്ബാൽ

കോവിഡ്‌ മഹാമാരിയുടെ അനുഭവത്തിന്റെ അടിസ്ഥാനത്തില്‍ മഹാമാരി പ്രതിരോധത്തിനുള്ള നിരവധി സംരംഭങ്ങള്‍ പല രാജ്യങ്ങളും ചില സ്വകാര്യ ഏജസികളും ആരംഭിച്ചിട്ടുണ്ട്‌. കോവിഡ്‌ വ്യാപിക്കുന്നതിനു മുന്‍പ്‌ സാഴ്സ്‌, മെഴ്‌സ്‌, എബോള, നിപ തുടങ്ങിയവ വിവിധ രാജ്യങ്ങളില്‍ പൊട്ടിപ്പുറപ്പെട്ടിരുന്നു. ഇത്തരം രോഗങ്ങള്‍ അടിക്കടി പ്രത്യക്ഷപ്പെട്ടു തുടങ്ങിയ സാഹചര്യത്തില്‍ ഇനി അടുത്ത മഹാമാരി എന്തായിരിക്കും എന്ന ചോദ്യം പല വിദഗ്ധരും ഉന്നയിച്ചിരുന്നു. സാഴ്‌സ്‌, മെഴ്‌സ്‌, ഫ്ളു എന്നീ പകര്‍ച്ചവ്യാധികളുടെ അനുഭവത്തിന്റെ അടിസ്ഥാനത്തില്‍ ജനിതകമാറ്റം സംഭവിക്കാനിടയുള്ള കൊറോണാ വൈറസ്‌ അല്ലെങ്കില്‍ ഫ്ളു വൈറസു മൂലമുള്ള ഒരു മഹാമാരിയായിരിക്കും ഇനി  എന്നും പ്രവചിക്കപ്പെട്ടിരുന്നു. എന്നാല്‍ ഈ മുന്നറിയിപ്പുകള്‍ വേണ്ടത്ര ഗൌരവത്തില്‍ പരിഗണിക്കപ്പെടാതെ പോയതിന്റെ തിക്തഫലം കൂടിയായിരുന്നു കോവിഡ്‌ വ്യാപനം.

 സാര്‍വദേശീയതലത്തില്‍ വ്യാപിക്കാന്‍ സാധ്യതയുള്ള 15 രോഗങ്ങളുടെ നിയന്ത്രണത്തിന്‌ സ്വീകരിക്കേണ്ട നടപടിക്രമങ്ങള്‍ വിശദീകരിച്ച സഹായരേഖ ലോകാരോഗ്യസംഘടന 2018-ല്‍ പ്രസിദ്ധീകരിച്ചിരുന്നു. കോളറ, പ്ലേഗ്‌, മഞ്ഞപ്പനി എന്നിവ വീണ്ടും പ്രത്യക്ഷപ്പെടുകയും പുതിയ രോഗങ്ങള്‍ ആവിര്‍ഭവിക്കുകയും ചെയ്യിരിക്കുന്ന സാഹചര്യത്തില്‍ പകര്‍ച്ചവ്യാധിനിയന്ത്രണത്തിനും നിരീക്ഷണത്തിനും ലോകരാജ്യങ്ങള്‍ പരസ്പരസഹകരണത്തോടെ പ്രതിരോധസംവിധാനങ്ങള്‍ സംഘടിപ്പിക്കേണ്ടതിന്റെ ആവശ്യകത ഈ രേഖയില്‍ ചൂണ്ടിക്കാട്ടിയിരുന്നു. ഇത്തരം മാര്‍ഗനിര്‍ദേശങ്ങളും പെരുമാറ്റ ച്ചട്ടങ്ങളും ഗാരവമായി പരിഗണിക്കുന്നതില്‍ ലോകരാജ്യങ്ങള്‍ പലതും പരാജയപ്പെട്ടുവെന്നാണ്‌ കോവിഡ്കാലത്തുണ്ടായ അനുഭവങ്ങള്‍ വ്യക്തമാക്കുന്നത്‌.