ചിരിക്കാം ചിരിപ്പിക്കാം

പ്രശ്നംനിറഞ്ഞ ഏതുസന്ദർഭത്തെയും സ്വാഭാവികമായി കാണാനും പ്രായോഗികതയോടെ ചിന്തിക്കാനും യുക്തിപരമായി പ്രവർത്തിക്കാനും ഉള്ളിൽ നർമമുള്ളവർക്കു കഴിയും

- ഡോ.അദിതി എൻ. റിട്ട. അസോസിയേറ്റ്പ്രൊഫസർ മനഃശാസ്ത്രവിഭാഗം എം.ജി.കോളജ്, തിരുവനന്തപുരം

ചില അനുഭവങ്ങളും സംഭവങ്ങളും ഇടപെടലുകളും ചിരിയുണർത്തുന്ന വിനോദം നൽകുന്ന ചിലപ്പോൾ ചിന്തിപ്പിക്കുന്ന മാനസികാവസ്ഥയെയാണ് നർമം എന്നുപറയുന്നത്. ജീവിതത്തിന്റെ ബഹുമുഖമായ സങ്കീർണതകളിൽ അല്പമെങ്കിലും രക്ഷയാവുന്നത് ഈ നർമബോധമാണ്. വിൻസ്റ്റൻ ചർച്ചിലിന്റെ എഴുപത്തഞ്ചാം പിറന്നാളിൽ ചിത്രമെടുക്കുന്നതിനിടെ ഒരു യുവ ഫോട്ടോഗ്രാഫർ അങ്ങയുടെ നൂറാം പിറന്നാളിലും ഇതുപോലെ ചിത്രമെടുക്കാൻ എനിക്ക് കഴിയണം എന്ന ആഗ്രഹം പ്രകടിപ്പിച്ചു. എന്തുകൊണ്ടു പാടില്ല? നിങ്ങൾക്കു ഭേദപ്പെട്ട ആരോഗ്യമുണ്ടെന്നാണല്ലോ തോന്നുന്നത് എന്നായിരുന്നു ചർച്ചിലിന്റെ മറുപടി.

അസാധാരണമായ നർമബോധവും കൗതുകമുണർത്തുന്ന ദ്വയാർഥപരാമർശങ്ങളുംകൊണ്ട് മലയാളികളുടെ ഫലിതശേഖരത്തിന്റെ പ്രിയപ്പെട്ട ഭാഗമായിത്തുടരുന്ന കുഞ്ചൻ നമ്പ്യാരെക്കുറിച്ച് ഓർക്കുക. നർമത്തിൽ പൊതിഞ്ഞ സാമൂഹികവിമർശമാണ് അദ്ദേഹത്തിന്റെ മുഖമുദ്ര. മഹാരാജാവിൽ നിന്ന് സമ്മാനങ്ങൾ കൈക്കലാക്കാൻ സ്തുതിപാഠകർ വാഴ്ത്തു പാട്ടുകൾ പാടുമ്പോൾ, ദീപ സ്തംഭം മഹാശ്ചര്യം നമുക്കും കിട്ടണം പണം എന്നുപാടി, അവരുടെ പണക്കൊതിയും കുത്സിതബുദ്ധിയും അദ്ദേഹം വെളിവാക്കി.