കൃത്യതയോടെ റേഡിയേഷൻ ചികിത്സ

കാൻസർ കോശങ്ങളെ മാത്രം ലക്ഷ്യമിട്ട് കൃത്യതയോടെ റേഡിയേഷൻ നൽകുന്ന രീതിയിലേക്ക് ചികിത്സ മാറിക്കഴിഞ്ഞു. ഇതിലൂടെ പാർശ്വഫലങ്ങൾ ഗണ്യമായി കുറയ്ക്കാനും സാധിച്ചിട്ടുണ്ട്

- ഡോ.അനൂപ്ആർ.

ശരീരത്തിനുള്ളിൽ നിന്നു തന്നെ റേഡിയേഷൻ നൽകുന്ന രീതി എത്രമാത്രം ഫലപ്രദമാണ്?

റേഡിയേഷൻ നൽകാൻ പ്രത്യേക റേഡിയോ ആക്ടീവ് സ്രോതസ്സ് ശരീരത്തിനകത്ത് കടത്തി കാൻസർ ബാധിച്ച കൃത്യമായ സ്ഥലത്ത് റേഡിയേഷൻ നൽകുന്ന ചികിത്സാരീതിയാണ് ആന്തരീക റേഡിയേഷൻ തെറാപ്പി, ഇങ്ങനെ റേഡിയേഷൻ നൽകാൻ ഉപയോഗിക്കുന്ന വസ്തു ഖരാവസ്ഥയിലുള്ളതോ ദ്രാവകാവസ്ഥയിലുള്ളതോ ആകാം. എന്നാൽ ഈ രീതി ചുരുക്കം ചില കാൻസറുകളുടെ ചികിത്സയിൽ മാത്രമേ ഉപയോഗിക്കാറുള്ളൂ. ശരീരത്തിനകത്ത് കടത്തിയ വസ്തുവിൽനിന്ന് കാൻസർ ബാധിതമായ ഭാഗത്തിന് വളരെ അടുത്തുനിന്നു തന്നെ റേഡിയേഷൻ നൽകാൻ കഴിയുന്നു എന്നതുകൊണ്ട് ആരോഗ്യമുള്ള കോശങ്ങളെ അധികം ബാധിക്കില്ല എന്ന മെച്ചമുണ്ട്.

ഖരാവസ്ഥയിലുള്ള റേഡിയോ ആക്ടീവ് സ്രോതസ്സ് ഉപയോഗിച്ച് റേഡിയേഷൻ നൽകുന്നതിനെ ബ്രാക്കി തെറാപ്പി എന്നാണ് പറയുക. ഈ ചികിത്സാരീതിയിൽ കാൻസർ മുഴയുടെ വളരെ അടുത്ത് റേഡിയേഷൻ നൽകുന്ന വസ്തു സ്ഥാപിക്കും. തല കഴുത്ത്, സ്തനം, ഗർഭാശയമുഖം, പ്രോസ്റ്റേറ്റ്, കണ്ണ് എന്നിവിടങ്ങളിലെ കാൻസറുകളുടെ ചികിത്സയ്ക്കാണ് മിക്കപ്പോഴും ബ്രാക്കി തെറാപ്പി പ്രയോജനപ്പെടുത്തുന്നത്.

ദ്രാവകാവസ്ഥയിലുള്ള വസ്തു ശരീരത്തിലേക്ക് കടത്തി റേഡിയേഷൻ നൽകുന്നതിനെ സിസ്റ്റമിക് റേഡിയേഷൻ തെറാപ്പി എന്നുപറയുന്നു. ദ്രാവകാവസ്ഥയിലുള്ള റേഡിയോ ആക്ടീവ് അയഡിൻ, അയഡിൻ-131(131) എന്നിവയാ ണ് ഈ ചികിത്സയ്ക്ക് ഉപയോഗിക്കുക. ചിലതരം തൈറോയ്ഡ് കാൻസർ ചികിത്സിക്കാൻ ഇത് ഉപയോഗിക്കുന്നു.