സ്കൂൾ പടികൾ കയറും മുമ്പ്....

ആദ്യമായി സ്കൂളിലേക്കോ പ്ലേ സ്കൂളിലേക്കോ പോകാൻ വീട്ടിലെ കുട്ടി ഒരുങ്ങുന്നുണ്ടോ? അറിവിന്റെ ലോകത്തേക്ക് ചുവടുകൾ വെക്കുന്ന അവരിൽ അവധിക്കാലത്ത് തന്നെ ചില ശീലങ്ങൾ വളർത്താൻ ശ്രദ്ധിക്കണം...

- പി. ലിസി

വീണ്ടുമൊരു അധ്യയന വർഷംകൂടി വരുന്നു. കാർട്ടൂണും മൊബൈൽ ഗെയിമുകളും ടി.വി യുമെല്ലാമായി മാറിയ പുതുലോകത്തെ കുട്ടികൾ സ്കൂളിലേക്ക് ആദ്യ ചുവടുകൾ വെക്കാൻ ഒരുങ്ങുകയാണ്. വീടിന്റെ നാലു ചുമരുകൾക്കുള്ളിൽ നിന്ന് സ്കൂളിന്റെ വിശാലമായ അങ്കണത്തിലേക്ക്.

സമപ്രായക്കാരായ ഒരുപാട് കുട്ടികൾ, ഇതുവരെ കാണാത്ത അധ്യാപകർ, ക്ലാസ് മുറികളിലെ പഠനം, അങ്ങനെ അപരിചിതമായ ലോകമാണ് ഓരോ കുരുന്നിനെയും കാത്തിരിക്കുന്നത്. സ്വന്തം കൺവെട്ടത്തു നിന്ന് മക്കളെ മറ്റൊരിടത്തേക്ക് പറഞ്ഞയക്കുന്നതിന്റെ ടെൻഷൻ എല്ലാ മാതാപിതാക്കൾക്കുമുണ്ടാകും. അവരുടെ ശീലങ്ങൾ, പെരുമാറ്റം, പഠനം ഇതെല്ലാം ആവലാതിയായി നിറയും. സ്കൂളിലേക്ക് പുതുതായി പോകാൻ തയാറെടുക്കുന്ന മക്കളെ എങ്ങനെ നമുക്ക് ഒരുക്കിയെടുക്കാം എന്നതിൽ ടെൻഷനടിക്കേണ്ട. അവരെ മിടുക്കരായി പറഞ്ഞയക്കാൻ ഇക്കാര്യങ്ങൾ ശ്രദ്ധിക്കാം.

എഴുതി പഠിപ്പിക്കേണ്ട, വായിച്ചുകൊടുക്കാം

സ്കൂളിലെത്തും മുമ്പ് അക്ഷരങ്ങളും അക്കങ്ങളും എഴുതി പഠിപ്പിക്കണോ എന്നതാണ് പല മാതാപിതാക്കളുടെയും സംശയം. എന്നാൽ, പുതിയ പഠനരീതി അനുസരിച്ച് അവരെ വീട്ടിൽനിന്ന് എഴുതി പഠിപ്പിക്കേണ്ട കാര്യമില്ല. 

ഒറ്റയടിക്ക് എഴുത്തിന്റെയോ വായനയുടെയോ ലോകത്തേക്ക് കൊണ്ടുവരുമ്പോൾ അത് ഉൾക്കൊള്ളാൻ കുട്ടികൾക്ക് സാധിച്ചെന്നു വരില്ല. അവർക്ക് ഇംഗ്ലീഷ്, മലയാളം അക്ഷരമാ ലകൾ വായിച്ചു കൊടുക്കാം.

ഒരക്ഷരം കണ്ടാൽ അവർക്ക് തിരിച്ചറിയാൻ സാധിച്ചാൽ മാത്രം മതി. അക്ഷരങ്ങൾ പഠിപ്പിക്കുന്ന നിരവധി പിക്ചർ ബുക്കുകളും ഇപ്പോൾ വിപണിയിൽ ലഭ്യമാണ്. അത് വാങ്ങി അവരുടെ കൂടെയിരുന്ന് ദിവസവും വായിച്ചുകൊടുക്കാം.

സ്ഥിരമായി വായിച്ചുകൊടുക്കുമ്പോൾ അത് അവരുടെ ഓർമ യിൽ നിൽക്കും. അതുപോലെ അക്കങ്ങളും. അക്ഷരമാലകളും അക്കങ്ങളും പരിചയപ്പെടു ത്തുന്ന നിരവധി നഴ്സറി ഗാനങ്ങളുണ്ട്. ടി.വിയിലും ഫോണിലും അവ അവർക്ക് കാണിച്ചു കൊടുക്കാം. അതും അവരുടെ ഓർമയിൽ നിൽക്കും.

ഒപ്പംതന്നെ മൃഗങ്ങൾ, പൂക്കൾ, പഴങ്ങൾ, പച്ചക്കറികൾ ഇവയൊക്കെയുള്ള ചിത്രങ്ങൾ കാണിച്ച് പറഞ്ഞുകൊടുക്കാം. ശരീരഭാഗങ്ങളും ചിത്രങ്ങളിലൂടെ പറഞ്ഞുകൊടുക്കാം. അവർക്ക് തിരിച്ചറിയാൻ വേണ്ടി മാത്രം.

ഫോൺ ചങ്ങാത്തം കുറക്കാം