നൽകാം ജീവന്റെ തുള്ളികൾ

ഓരോ തുള്ളി രക്തത്തിനും ജീവന്റെ വിലയുണ്ട്. രക്തദാനവുമായി ബന്ധപ്പെട്ട് ഒഴിവാക്കേണ്ട തെറ്റിദ്ധാരണകളും അറിയേണ്ട കാര്യങ്ങളുമിതാ...

- ഡോ. ഫസൽ പി.ടി Medical Practitioner Life line Hospital, Abudhabi

അത്യാഹിത വിഭാഗത്തിന്റെ ജീവൻരക്ഷാ പ്രവർത്തനങ്ങളിൽ അവിഭാജ്യ ഘടകമാണ് രക്തം. രക്തദാനത്തിലൂടെ മറ്റൊരു ജീവിതത്തിന്റെ തുടിപ്പുകളാണ് നാം നിലനിർത്തുന്നത്. ഒരാളിൽ നിന്നെടുക്കുന്ന ഓരോ തുള്ളി രക്തവും ഒന്നോ അതിലധികമോ ആളുകൾക്ക് ജീവൻ സമ്മാനിക്കുകയാണ്.

ആ നന്മക്കു പകരം വെക്കാൻ മറ്റൊന്നുമില്ല. മറ്റൊരാളുടെ ജീവനുവേണ്ടി ഇന്ന് നൽകുന്ന രക്തം നാളെ നമുക്കും വേണ്ടി വന്നേക്കാം എന്ന തിരിച്ചറിവാണ് ഉണ്ടാകേണ്ടത്.

നിങ്ങളുടെ രക്തദാനം പല മുഖങ്ങളിലും പുഞ്ചിരിക്ക് കാരണമാകും. നിങ്ങളുടെ ഓരോ തുള്ളി രക്തത്തിനും ജീവന്റെ വിലയുണ്ട്. നമുക്ക് മറ്റുള്ളവരെയും രക്തം ദാനം ചെയ്യാൻ പ്രേരിപ്പിക്കാം. രക്തം ദാനം ചെയ്താൽ നമുക്ക് വിപത്തല്ല ഗുണങ്ങളാണ് ഉണ്ടാകുന്നത്.

ഒഴുകുന്ന ജീവൻ എന്നാണ് ആരോഗ്യ വിദഗ്ധർ രക്തത്തെ വിശേഷിപ്പിക്കുന്നത്. വളരെ സുരക്ഷിതവും ലളിതവുമാണ് രക്തദാനം. എന്നാൽ, ഇതേക്കുറിച്ചുള്ള അറിവില്ലായ്മയും തെറ്റായ വിവരങ്ങളും പലപ്പോഴും ജനങ്ങളിൽ ഭയം നിറക്കുകയും രക്തദാനത്തിന് മുന്നോട്ടു വരാതിരിക്കാൻ കാരണമാകുകയും ചെയ്യുന്നു.

ആരാണ് സന്നദ്ധ രക്തദാതാവ്?

ശരിയായ ദാതാവിൽനിന്ന്, ശരിയായ സമയത്ത്, ശരിയായ സ്വീകർത്താവിന്, ശരിയായ രക്തം എന്നതാണ് സുരക്ഷിതമായ രക്തദാനമെന്ന ബൃഹദ് പ്രക്രിയകൊണ്ട് അർഥമാക്കുന്നത്. ലാഭേച്ഛ കൂടാതെ പൂർണ ഇഷ്ടത്തോടെ സ്വമേധയാ നേരിട്ടോ അല്ലാതെയോ രക്തദാനം നടത്തുന്ന ആളാണ് സന്നദ്ധ രക്തദാതാവ്. വിവിധ തരത്തിലുള്ള രക്തദാതാക്കൾ ഉണ്ടെങ്കിലും സന്നദ്ധ രക്തദാതാക്കളെയാണ് നമ്മൾ പ്രോത്സാഹിപ്പിക്കേണ്ടത്.

രക്തവും രക്ത ഉൽപന്നങ്ങളും ആവശ്യമുള്ളവർ

• അപകടാനന്തര രോഗികൾ

• അർബുദ രോഗികൾ

• ബ്ലഡ് ഡിസോർഡർ രോഗി

• ശസ്ത്രക്രിയ രോഗികൾ

• പ്രീ ടേം കുഞ്ഞുങ്ങൾ

• പ്രസവത്തോടനുബന്ധിച്ചുണ്ടാകുന്ന ആവശ്യങ്ങൾ

• പൊള്ളൽ

രക്തദാതാവ് ശ്രദ്ധിക്കേണ്ട കാര്യങ്ങൾ

• മാനസികമായി തയാറെടുക്കുക.

• ആരോഗ്യമുള്ള 18 വയസ്സായ ഏതൊരു വ്യക്തിക്കും രക്ത ദാനം നടത്താം.

• 65 വയസ്സുവരെ രക്തം ദാനം ചെയ്യാം. ആദ്യത്തെ രക്തദാനം നടത്താനുള്ള ഉയർന്ന പ്രായപരിധി 60 വയസ്സാണ്.

• രക്തം ദാനം ചെയ്യുന്ന ആൾ പൂർണ ആരോഗ്യവാൻ/ ആരോഗ്യവതി ആയിരിക്കണം.