એનાલિસિસ

આ લોકસભા ચૂંટણીમાં ગુજરાતમાં ભાજપની હેટ્રિક કે હિટ વિકેટ

-  સુધીર એસ. રાવલ

લોકસભાની ચૂંટણીમાં પ્રત્યેક બેઠકનું મહત્ત્વ છે, પરંતુ ગુજરાતનું વિશેષ મહત્ત્વ એ રીતે છે કે તે સત્તાધારી પક્ષના બે સૌથી મહત્ત્વના નેતાઓ વડાપ્રધાન નરેન્દ્ર મોદી અને ગૃહમંત્રી ઉપરાંત ચૂંટણીના ચાણક્ય અમિત શાહની હોમ પીચ છે. આ લેખ પ્રકાશિત થશે ત્યારે ત્રીજા તબક્કાના મતદાનને આડે ચારેક દિવસ બાકી રહ્યા હશે. આ તબક્કાનું મતદાન ૭ મેના રોજ છે, જેમાં ગુજરાતની બધી ૨૬ બેઠકો સામેલ છે. સુરત બેઠકના મતદારોનો મતાધિકાર વગર વાંકે છીનવાઈ ગયો, તે આપણા વર્તમાન રાજકારણની બલિહારી છે! આ બેઠક પર કોંગ્રેસના ઉમેદવારનું ફોર્મ રદ થતાં, તેમ જ બાકીના ઉમેદવારોએ ઉમેદવારી પાછી ખેંચી લેતા સુરત બેઠક ભાજપને ફાળે ગઈ છે. હવે બાકીની ૨૫ બેઠકો પર ૨૬૬ ઉમેદવારો મેદાનમાં છે, જેમાં ૧૯ મહિલાઓ સામેલ છે. અહીંયા વિધાનસભાની પાંચ બેઠકો વિજાપુર, પોરબંદર, માણાવદર, ખંભાત અને વાઘોડિયાના કોંગ્રેસના ધારાસભ્યો ભાજપમાં જોડાઈ જતા આ બેઠકો પર પેટા ચૂંટણી પણ સાથે જ યોજાઈ રહી છે.

ગુજરાતનું રાજકીય ચિત્ર કેવું છે?

લોકસભાની ૨૦૧૪ અને ૨૦૧૯ની બંને ચૂંટણીમાં ગુજરાતમાં ભારતીય જનતા પક્ષે બધી જ બેઠકો જીતેલી છે. આમ પણ ગુજરાતમાં છેલ્લાં પચ્ચીસ કરતાં વધારે વર્ષોથી ભારતીય જનતા પક્ષનું એકચક્રી શાસન ચાલી રહ્યું છે. સ્થાનિક સ્તરે સતત નબળી નેતાગીરીના કારણે કોંગ્રેસની સ્થિતિ છેલ્લાં ઘણાં વર્ષોથી ભાજપ માટે પડકારજનક નથી રહી. છેલ્લાં ૧૦ વર્ષ દરમિયાન કોંગ્રેસના મોટા ગજાના ઘણા નેતાઓ કે જેઓ જુદા-જુદા સમુદાયો પર પ્રભુત્વ ધરાવતા હતા, તેઓ ભાજમાં જોડાઈ ગયા છે. આ સિલસિલો આજે પણ ચાલુ છે. કોંગ્રેસનું આવું પતન રોકનાર કોઈ પ્રભાવશાળી નેતા સ્થાનિક સ્તરે અહીં કોંગ્રેસમાં ન હોવાથી કોંગ્રેસની વિચારધારાને પ્રતિબદ્ધ મતદારો અને કાર્યકર્તાઓ નિરાશ છે. વળી, આ કારણે જ નવી પેઢીના યુવાનો પણ કોંગ્રેસ સાથે જોડાતા ખચકાટ અનુભવે છે.