નાનાં-નાનાં સુખનો સરવાળો એ જ જીવન છે!

બે અક્ષરનો સુખ શબ્દ આપણને ઝાંઝવાની જેમ દોડાવ્યા રાખે છે. જોકે કસ્તૂરીમૃગની નાભિમાં વસતી સુવાસની જેમ સુખ તો આપણી પાસે જ હોય છે.

- મિલી મેર

ઉનાળામાં શહેરના કોઈ ગીચ રોડ પર આપણું વ્હીકલ પાર્ક કરવા ઝાડ નીચે કોઈ સરસ જગ્યા મળી જવી. સ્ટવ પર મૂકેલું દૂધ ઊભરાવાનો અવાજ આવે ત્યારે ગૃહિણી કિચનમાં દોડીને પહોંચી જાય અને એકદમ અણીના સમયે દૂધનું ઊભરાતું બચી જવું. બસમાં ચડતા સરસ વિન્ડો સીટ મળી જવી. કોઈ સરકારી કચેરીમાં એક ધક્કામાં કામ થઈ જવું. ચાલ્યા જતાં હો અને પાછળથી ઘણા સમયે મળતા એક ભાઈબંધના ધબ્બાનું પડવું. ઘરે આવો અને સ્માઇલ સાથે ઘરનું બારણું ખોલતાં સ્વજન. જોબ પરથી આવેલી પુત્રવધૂને સાસુએ ધરેલો પાણીનો ગ્લાસ. ઘરનું સાદું ભોજન ધરાઈને જમી લેતું સંતાન. રોજ આવી નાની બાબતો પર ધ્યાન આપીએ તો એમ થાય કે આવાં નાનાં-નાનાં સુખનો સરવાળો એ જ જીવન છે. આવાં તો કેટકેટલાં નાનાં-નાનાં સુખ આપણાં રોજબરોજના જીવનમાં મોં ૫૨ મરકલડાં બનીને આવતાં હોય છે.