જૂથવાદનો ગિરનારી પવન કોનું વહાણ ડુબાડશે?

ભાજપમાં એક તરફ સદસ્યતા અભિયાન પુરજોશમાં ચાલી રહ્યું છે ત્યારે જૂનાગઢમાં જવાહર ચાવડાએ પાર્ટી સામે જાહેરમાં જંગ છેડીને પ્રદેશ નેતાગીરીને પડકારી છે.

- ધીરુ પુરોહિત (જૂનાગઢ)

એવું કહેવાય કે સોરઠમાં જ્યારે રાજકીય હલચલ થાય છે ત્યારે ગુજરાતના રાજકારણમાં કંઈક નવા-જૂની થાય છે... ૧૯૯૦ના દાયકામાં પહેલી વાર ગુજરાત ભાજપમાં ભાગલા પડ્યા ત્યારે એની ચિનગારી જૂનાગઢથી ઊઠી હતી. એ સમયે શંકરસિંહ વાઘેલા સાથે જૂનાગઢના નારસીભાઈ પઢિયાર, મોહનભાઈ પટેલ અને જશાભાઈ બારડ ભાજપમાંથી છૂટા પડ્યા હતા અને ગુજરાતમાં રાજકીય પરિવર્તન આવ્યું હતું. ભાજપમાં ત્યારે ખજૂરિયા-હજૂરિયા એમ બે ભાગ પડ્યા ને પછી શંકરસિંહે રાષ્ટ્રીય જનતા પાર્ટી (રાજપા)નું ગઠન કર્યું હતું.

એના ત્રણેક દાયકા બાદ ફરી એક વાર સોરઠના રાજકારણમાં ગિરનારી પવન ફૂંકાયો છે ત્યારે આંતરિક અસંતોષની આ આગ ગુજરાત ભાજપમાં કોને લપેટમાં લેશે એની ગુજરાતના રાજકારણમાં ચર્ચા જાગી છે.

જવાહર ચાવડા

લેટર બૉમ્બની લડાઈનું પરિણામ ભાજપને નુકસાન પહોંચાડી શકે છે.

ગુજરાત ભાજપની સરકારમાં કૅબિનેટ મંત્રી રહી ચૂકેલા નેતા જવાહર ચાવડા જૂનાગઢ જિલ્લા ભાજપપ્રમુખ કિરીટ પટેલ સામે એક પછી એક લેટર બૉમ્બ ફોડી રહ્યા છે. કિરીટ પટેલ એકસાથે ત્રણ હોદ્દા ધરાવે છે. સંગઠન અને સહકારી બૅન્ક પરની પકડને કારણે એ વર્ષોથી જિલ્લામાં એકચક્રી શાસન ચલાવે છે, એ સામે જવાહર ચાવડાએ હવે પડકાર ફેંક્યો છે.