പരിസരവാസി

ശശാങ്കന് ഭാര്യ രമണിയിൽ സംശയം തോന്നിത്തുട ങ്ങിയിട്ട് കുറച്ചുനാളുകളായി. മദ്യം തലയ്ക്ക് പിടിക്കുന്ന ചില രാത്രികളിൽ അതു ബലപ്പെട്ടു. ഈ വീടിന്റെ പരിസരത്തുള്ള ഏതോ ഒരുത്തനു മായി രമണിക്ക് അടുപ്പമുണ്ട്. അതുകൊണ്ടാണ് ഈയിടെയായി അവൾ തന്നെ തീർത്തും അവഗണിക്കുന്നത്. എന്തെങ്കിലും ചോദിച്ചാൽ അളന്നുമുറിച്ച് മറുപടിയാണ് കിട്ടുന്നത്. കിടപ്പറയിൽ പോലും ഒരു സഹകരണവുമി ല്ല. എപ്പോഴും കുത്തുവാക്കുകൾ പറയുന്നതുകേൾക്കാം.

- സോജിതോമസ്

ഇന്നുരാവിലെ മുറ്റത്തുനിന്ന് ലഭിച്ച രണ്ട് വസ്തുക്കൾ അയാളുടെ സംശയത്തിന് ആക്കം കൂട്ടി. എരിഞ്ഞു തീരാറായ ഒരു ബീഡിക്കുറ്റിയായിരുന്നു ആദ്യം കിട്ടിയത്. രണ്ടാമത്തേത് ഒരു ചെറിയ പ്ലാസ്റ്റിക് കുപ്പി. അതിന്റെ അടപ്പു തുറന്ന് മൂക്കിനോടടുപ്പിച്ചപ്പോൾ കുഴമ്പിന്റെ രൂക്ഷഗന്ധം അനുഭവപ്പെട്ടു.

മിക്കവാറും ദിവസങ്ങളിൽ താൻ മദ്യപിക്കാറുണ്ട്. നാളിതുവരെ സിഗററ്റോ ബീഡിയോ വലിച്ചിട്ടില്ല. അങ്ങനെയുള്ള തന്റെ വീട്ടുമുറ്റത്ത് എങ്ങനെ ബീഡിക്കുറ്റി വന്നു? കുഴമ്പുപയോഗിക്കത്തക്ക ശരീരവേദന രമണിക്കോ തനിക്കോ ഇല്ല. അതുകൊണ്ടുതന്നെ ഈ വീട്ടിനുള്ളി ലെങ്ങും കുഴമ്പോ ദേഹത്ത് പുരട്ടുന്ന മറ്റ് തൈലമോ ഒന്നും തന്നെയില്ല. ഇന്നലെ വൈകിട്ട് ആറരയ്ക്ക് പുറത്തുപോകു മ്പോൾ ഈ ബീഡിക്കുറ്റിയും കുഴമ്പിന്റെ കുപ്പിയും മുറ്റത്ത് ഉണ്ടായിരുന്നില്ലെന്ന് നൂറുശതമാനം ഉറപ്പാണ്. അത് വ്യക്തമായി ഓർക്കാൻ കാരണം ആ വീഴ്ചയാണ്. വരാന്തയിൽ നിന്ന് മുറ്റത്തേ യ്ക്കിറങ്ങിയപ്പോൾ കാലുതെന്നി താഴേക്ക് വീണു. ഷർട്ടിന്റെ പോക്കറ്റിലുണ്ടായിരുന്ന ചില്ലറത്തുട്ടുകൾ നാലു പാടും ചിതറിത്തെറിച്ചു. അതുകണ്ടത്താൻ മുറ്റം മുഴുവൻ അരിച്ചുപെറുക്കേണ്ടി വന്നു. അപ്പോഴൊന്നും കാണാത്ത ഈ രണ്ട് വസ്തുക്കൾ ഇരുട്ടി വെളുത്തപ്പോൾ ഇവിടെ എങ്ങനെയാണ് വന്നത്? ഇതിൽ നിന്നും മനസ്സിലാകുന്നത് താൻ പുറത്തുപോയ ആറരയ്ക്കും മടങ്ങി വന്ന ഒമ്പതുമണിക്കുമിടയിൽ ആണൊരുത്തൻ ഈ വീട്ടിൽ വന്നു എന്നതാണ്. സന്ധ്യവരെ വഴിയിലൂടെ ആൾ സഞ്ചാരമുള്ളതിനാൽ അതിനുശേഷമാകാം അവൻ എത്തിയത്.

താലികെട്ടിയ ഭർത്താവ് ജീവനോടെയിരിക്കുമ്പോൾ അന്യപുരുഷനെ വീട്ടിൽ വിളിച്ചു കേറ്റിയ വഞ്ചകി. നീയും നിന്റെ മറ്റവനും ഒരിക്കലും കരുതിയിരിക്കില്ല ഞാൻ ഇത് കണ്ടുപിടിക്കുമെന്ന്. ഏത് കുറ്റവാളിയും എന്തെങ്കിലും ഒരു തെളിവ് അവശേഷിപ്പിക്കാറുള്ളതു പോലെ അവൻ ഉപേക്ഷിച്ച വിലപ്പെട്ട തെളിവുകളാണ് എരിഞ്ഞുതീരാറായ ബീഡിക്കുറ്റിയും കാലിയായ കുഴമ്പു കുപ്പിയും. ഇതുരണ്ടും വെച്ച് ബുദ്ധിമാനായ ഈ ശശാങ്കൻ നിന്റെയൊക്കെ ചീട്ടുകീറും. ശരിയാക്കിത്തരാം ഞാൻ.

എരിഞ്ഞുതീരാറായ ബീഡിക്കുറ്റി അവന് ബീഡിയോട് ആക്രാന്തം കൂടുതലുണ്ടെന്നാണ് സൂചിപ്പിക്കുന്നത്. തുടരെ തുടരെ വലിക്കുന്നവനാകാം. പുറത്തുപോകുമ്പോൾ പോലും കുഴമ്പു കുപ്പി കയ്യിൽ കരുതണമെങ്കിൽ ശരീരത്ത് സ്ഥിരം വേദനയുള്ളവനാകാം. പ്രയാസമുള്ള ജോലി ചെയ്യുമ്പോൾ വേദന കൂടുമെന്നുറപ്പുള്ളതിനാൽ കൊണ്ടുവന്നതാകാനും സാധ്യതയുണ്ട്.