டாக்டருக்கு கத்திக்குத்து! அரசுக்கு எதிராக மருத்துவர்கள்!

சென்னை கிண்டியிலுள்ள கலைஞர் நூற்றாண்டு உயர்சிறப்பு அரசு மருத்துவமனையின் புற்றுநோய் பிரிவுத்துறை தலைவர் டாக்டர் பாலாஜி ஜெகன்னாத் மீது நடத்தப்பட்ட கத்திக்குத்து சம்பவம் தமிழகத்தையே அதிர்ச்சியடைய வைத்திருக்கிறது.

- -இரா.இளையசெல்வன்

டாக்டர் பாலாஜியை கத்தியால் குத்திய இளைஞர் விக்னேஷ் கைது செய்யப்பட்டு சிறையில் அடைக்கப்பட்டிருக்கிறார். கத்திக்குத்தில் படுகாயமடைந்த டாக்டர் பாலாஜிக்கு தீவிர சிகிச்சையளிக்கப்பட்டதில் அபாயகட்டத்தைத் தாண்டியிருக்கிறார்.

புற்றுநோயால் நீண்ட காலமாக அவஸ்தைப்பட்டு வந்திருக்கிறார் குற்றவாளி விக்னேஷின் தாய் பிரேமா. எஸ்.ஆர்.எம்., சவீதா உள்ளிட்ட பல்வேறு தனியார் மருத்துவமனைகளிலும், கிண்டியிலுள்ள புற்றுநோய் மருத்துவமனையிலும் இதற்காக ட்ரீட்மெண்ட் எடுத்துள்ளார் பிரேமா. நோய் குணமாகாததால் இந்த அரசு மருத்துவமனையில் அட்மிட் ஆகிறார் பிரேமா. பல மாதங்களாக அவருக்கு சிகிச்சையளித்து வந்துள்ளார் டாக்டர் பாலாஜி. இந்த நிலையில்தான், கத்தியால் குத்தியிருக்கிறார் விக்னேஷ்.

இதுகுறித்து மருத்துவமனை டாக்டர்கள் மற்றும் நர்ஸ்களிடம் விசாரித்தபோது, "பிரேமாவுக்கு புற்றுநோய் 5-வது ஸ்டேஜ் வரை முற்றிப்போயிருக்கிறது. ஆரம்பத்திலேயே இந்த அரசு மருத்துவமனைக்கு வந்திருந்தால் அவரை எளிதில் குணமாக்கியிருக்கலாம். ஆனால், தனியார் மருத்துவமனைகளில் எடுத்துக்கொண்ட சிகிச்சை பலனளிக்காததால்தான் இங்கு வந்தார். பிரேமாவுக்கு நோய் முற்றிவிட்டதால் அதற்குத் தேவையான சிகிச்சை தரப்பட்டது. நோயின் தாக்கம் அதிகமாக இருந்ததால் குணமாவதில் சிக்கல் இருக்கிறது. இதனை பிரேமாவிடமும், விக்னேஷிடமும் டாக்டர் பாலாஜி தெளிவுபடுத்தியிருக்கிறார். அவரது பதிலில் அவர்களுக்கு திருப்தி இல்லை போலும். தினமும் வருவதுபோல, 13-ந்தேதியும் மருத்துவமனைக்கு வந்தார் விக்னேஷ்.