கைதி எண் 9658

ஆயில்யத்து குற்றியேரி கோபாலன் என்னும் மிக நீண்ட பெயருக்குள் யார் இருக்கிறார் என்பதை உங்களுக்கு எட்டிப் பார்க்க தோன்றலாம். அந்த பெயருக்குள் ஒரு அனல் வீசும் தகிப்பு, காலந்தோறும் வாழ்ந்து வந்திருக்கிறது. அந்த பெயர், பயணம் செய்யாத இடம் என்று எதுவுமே இல்லை.

வியட்நாம் தந்தை ஹோசிமின், "நான் மலைகள் தோறும் ஏறி இறங்கி மக்களை சந்திப்பவன். அங்குதான் நான் புரட்சியாளர்களைக் கண்டுபிடிக்கிறேன். விளைவு என் கைகளை விட என் கால்கள் வலிமை கொண்டவையாகி விட்டன" என்றார். இந்த அனல் வீசும் பெயரின் இந்த கால்களும், மிகுந்த வலிமை கொண்டவை. எல்லா காலங்களிலும் ஒரு புயலின் தீவிரம் இதற்கு இருந்திருக்கிறது. அய்யா நல்லகண்ணு பலமுறை இந்த புரட்சியாளரைப் பற்றிய தகவல்களை என்னிடம் கூறியிருக்கிறார்.

இலங்கையின் தேயிலைத் தோட்டங்கள், மலேசியாவின் ரப்பர் தோட்டங்கள், சிங்கப்பூரின் இந்திய தூய்மைத் தொழிலாளர்கள் என்று எல்லா இடத்திற்கும் சென்று திரும்பின. இந்த கால்கள் பாதிப்பின் குரல் கேட்டு பம்பாய், உத்திரப்பிரதேச துயரங்களில் பங்கேற்றன. 'ஏ... எனது இனிய தமிழகமே சுதந்திரத்தை ஒட்டிய ஆண்டுகளில் இந்த மண்ணின் ஒதுக்குப் புறங்களில் தலையை மறைத்துக்கொண்டு செயல்செய்த அந்த பெயரின் புரட்சிகர செயல்பாட்டை நீ அறிந்திருக்க மாட்டாய். அதன் பெயர்தான் ஏ.கே.கோபாலன். இவருக்கும் வேலூர் சிறைக்கும் ஒரு தொப்புள் கொடி உறவு இருக்கிறது.

கம்யூனிஸ்டு கட்சி மூன்றாகப் பிரிந்த பின்னர் அதன் உள் உறவுகள் சீர்கெட்டுப் போயிருந்தது. இந்தக் கண்ணோட்டம் கூடாது. பொதுவான தோழமை உணர்ச்சி வேண்டும் என்ற உணர்வை எனக்குள் உருவாக்கியவர் தோழர் நல்லகண்ணு அவர்கள். அதன் பின்னர்தான் கட்சி சார்பற்ற வாசிப்புமுறை எனக்குள் வந்தது. அந்த மாவீரனின் மறைக்கப்பட்ட வரலாற்றைத் தேடி மனம் அலையத் தொடங்கியது.