குறைந்த காற்றழுத்த தாழ்வு பகுதி மேலும் வலுவடைந்தது : சென்னை, 3 மாவட்டங்களுக்கு ரெட் அலர்ட்

வங்கக் கடலில் நிலை கொண்டுள்ள ஆழ்ந்த காற்றழுத்த தாழ்வுப் பகுதி மேலும் வலுப்பெற்று காற்றழுத்த தாழ்வு மண்டலமாக மாறியது.

அதிகாலை முதல் அதிகனமழை கொட்டும்

இதனால் வட தமிழகம் மற்றும் தெற்கு ஆந்திரப்பகுதிகளில், குறிப்பாக சென்னை, காஞ்சிபுரம், செங்கல்பட்டு, திருவள்ளூர் மாவட்டங்களில் இன்று அதிகாலை முதல் அதி கன மழை பெய்யும் என்பதால் சிவப்பு எச்சரிக்கை (ரெட் அலர்ட்) விடப்பட்டுள்ளதாக சென்னை வானிலை ஆய்வு மையம் தெரிவித்துள்ளது.

தமிழகத்தில் நேற்று தென்மேற்கு பருவமழை முடிந்த நிலையில், வடகிழக்கு பருவமழை தொடங்கி தீவிரம் அடைந்துள்ளது. அதன் காரணமாக வடதமிழகத்தில் மிக கனமழை பெய்யும் என்று வானிலை ஆய்வுமையம் எச்சரித்துள்ளது. சென்னை, திருவள்ளூர், காஞ்சிபுரம், செங்கல்பட்டு ஆகிய மாவட்டங்களில் நேற்று முன்தினம் முதல் மழை கொட்டி வருகிறது. குறிப்பாக சென்னையில் நேற்று முன்தினம் இரவு இடி, மின்னலுடன் கூடிய மழை வெளுத்து வாங்கியது. முன்னெச்சரிக்கையாக பள்ளிகள், கல்லூரிகள், அரசு அலுவலகங்களுக்கு விடுமுறை விடப்பட்டுள்ளது. தனியார் நிறுவன ஊழியர்களும் வீட்டில் இருந்தபடி பணியாற்ற அனுமதிக்கும்படி அரசு கேட்டுக் கொண்டுள்ளது. இதனால் தொடர்ந்து மழை பெய்தாலும் மக்களுக்கு பெரிய அளவில் பாதிப்புகள் இல்லை.

ஆனால் வடசென்னையில் புளியந்தோப்பு, ஓட்டேரி, எண்ணூர், திருவொற்றியூர் மற்றும் சூளை மேடு, ஆசாத்நகர், கோடம் பாக்கம், அசோக்நகர், எம்எம்டிஏ, வேளச்சேரி, மடிப்பாக்கம், மேடவாக்கம் ஆகிய இடங்களில் தண்ணீர் தேங்கத் தொடங்கியது. தொடர் மழையால் தண்ணீர் வடிவதில் சிரமம் உள்ளது. ஆனாலும், காற்றழுத்த தாழ்வு மண்டலம் தீவிரமடைவதால், இன்று காலை மற்றும் நாளை வரை அதி கனமழை பெய்யும் என்று வானிலை ஆய்வு மையம் எச்சரித்துள்ளது.

இதுகுறித்து சென்னை வானிலை ஆய்வு மையத்தின் தென் மண்டலத் கான தலைவர் பாலச்சந்திரன் நேற்று அளித்த பேட்டி:

கடந்த 24 மணி நேரத்தில் தமிழகம், புதுவையில் பரவலாக மழை பெய்துள்ளது. அதில் 42 இடங்களில் கனமழை பெய்துள்ளது. அதிகபட்சமாக புதுக்கோட்டை மாவட்டத்தில் குடுமியான்மலையில் 130 மிமீ மழை பதிவாகியுள்ளது.