தீபாவளியை கொண்டாட சென்னையில் இருந்து 15 லட்சம் பேர் சொந்த ஊர் பயணம்

கடைசிநாளில் கடைவீதிகளில் மக்கள் வெள்ளம் பட்டாசு, சுவீட் விற்பனை அமோகம் கோயில்களில் இன்று சிறப்பு வழிபாடு

சென்னை, அக்.31: தீபாவளி பண்டிகை இன்று கோலாகலமாக கொண்டாடப்படுகிறது. இதையொட்டி நேற்று காலை முதல் கடைகளில் துணிகள், பட்டாசுகள், சுவீட்ஸ் விற்பனை களாகியது. இதனால் பஜார் வீதிகள் திக்குமுக்காடியது.

பஸ், ரயில் நிலையங்களில் கூட்டம் அலைமோதியது. சென்னையில் இருந்து மட்டும் பஸ், ரயில், கார், விமானம் மூலம் சுமார் 15 லட்சம் பேர் சொந்த ஊர்களுக்கு புறப்பட்டு சென்றனர்.

தீபாவளி பண்டிகை இன்று வழக்கமான உற்சாகத்துடன் கோலாகலமாக கொண்டாடப்படுகிறது. தீபாவளியை பொதுமக்கள் புத்தாடை உடுத்தியும், பட்டாசுகள் வெடித்தும், நண்பர்கள்-விருந்தினர்களுக்கு இனிப்புகளை வழங்கியும் கொண்டாடுவது வழக்கம்.

இந்த நிலையில் தீபாவளி புத்தாடை உள்ளிட்ட பொருட்கள் விற்பனை கடந்த ஒரு மாதத்திற்கும் மேலாக தமிழகம் முழுவதும் உள்ள கடைகளில் முழு வீச்சில் நடைபெற்று வந்தது. மேலும், பண்டிகைக் கால பல்வேறு சிறப்பு தள்ளுபடிகளும் அறிவிக்கப் பட்டிருந்தது.

தீபாவளிக்கு முந்தைய நாளான நேற்று தமிழகம் முழுவதும் விற்பனை மேலும் அதிகரித்து காணப் பட்டது. சென்னையை பொறுத்தவரை தியாகராயநகர், புரசைவாக்கம், மயிலாப்பூர், வண்ணாரப் பேட்டை, பிராட்வே, தாம்பரம், குரோம்பேட்டை உள்ளிட்ட பகுதிகளில் காலை முதலே கூட்டம் அதிகமாக காணப்பட்டது. அதே நேரத்தில் வானம் மேகமூட்டத்துடன் காணப்பட்டது.

இந்த சந்தர்ப்பத்தை பயன்படுத்தி பொருட்கள் இறுதிக் கட்டப் பர்சேஸில் மக்கள் ஈடுபட்டனர். இதுமட்டுமின்றி, ஆந்திரா, புதுச்சேரி, கர்நாடகா போன்ற பகுதிகளில் இருந்தும் மக்கள் அதிகமாக சென்னைக்கு ஜவுளிகளை வாங்க வந்த காட்சியை காண முடிந்தது.

இதனால் நேரம் ஆக ஆக கூட்டம் வழக்கத்தை விட இரட்டிப்பாக காணப்பட்டது. மாலை நேரத்தில் இன்னும் கூட்டம் அதிகரித்தது. மாலை 4 மணிக்கு மேல் மழை பெய்தாலும் அதை பொருட்படுத்தாமல் கடை வீதிகளில் எங்கு திரும்பினாலும் மக்கள் தலைகளாக காட்சியளித்தது. அந்த அளவுக்கு பஜார் வீதிகள் திக்குமுக்காடியது.