உலகிலேயே முதன்முறையாக 3டி தொழில்நுட்பத்தில் மனித மூளையை ஆவணப்படுத்தியது சென்னை ஐஐடி

உலகிலேயே முதன்முறையாக 3டி தொழில்நுட்பத்தில் டிஜிட்டல் முறையில் மனித மூளையை ஆவணப்படுத்தி இருக்கிறது சென்னை ஐஐடி. இதற்காக நிச்சயம் நோபல் பரிசு கிடைக்கும் என ஐஐடி இயக்குனர் காமகோடி நம்பிக்கை தெரிவித்துள்ளார்.

ஆராய்ச்சி, கண்டுபிடிப்பில் சென்னை ஐ.ஐ.டி. எப்போதும் சிறந்து விளங்குகிறது. அந்த வகையில் மனித மூளையை 3டி வடிவிலான தொழில்நுட்பத்தை கொண்டு அதன் செல்-தெளிவுத் திறன் படங்களை சென்னை ஐ.ஐ.டி. எடுத்து வெளியிட்டு உள்ளது.

அமெரிக்கா போன்ற வளர்ந்த நாடுகள் மனித மூளையின் பாதி பகுதியைத்தான் இதுவரை படமாக எடுத்து வெளியிட்டு இருக்கின்றன. இதற்காக அவர்கள் செலவு செய்த தொகை என்பது 150 முதல் 200 மில்லியன் (அதாவது ரூ.1,500 கோடிக்கு மேல்) டாலர் ஆகும். ஆனால், சென்னை ஐ.ஐ.டி., ஒன்றிய அரசு, முன்னாள் மாணவர், தன் சொந்த நிதி ஆகியவற்றில் இருந்து ரூ.115 கோடியை செலவு செய்து மனித மூளையின் முழு பகுதிகளை படமாக எடுத்து, அதில் 5,132 மூளைப் பிரிவுகளை உலகிலேயே முதன்முறையாக 3டி தொழில்நுட்பத்தில் டிஜிட்டல் முறையில் ஆவணப்படுத்தி இருக்கிறது.