இந்தியா தீவிர கண்காணிப்பு

‘வங்கதேச நிலவரத்தை குறிப்பாக சிறுபான்மையினரின் நிலைமையை இந்தியா தீவிரமாக கண்காணித்து வருகிறது; அந்நாட்டு அதிகாரிகளுடன் தொடா்ந்து தொடா்பில் உள்ளோம்’ என்று நாடாளுமன்றத்தில் வெளியுறவுத் துறை அமைச்சா் எஸ்.ஜெய்சங்கா் செவ்வாய்க்கிழமை தெரிவித்தாா்.

‘வங்கதேசத்தில் நிலவும் சிக்கலான மற்றும் மாறுதலுக்குரிய சூழலைக் கருத்தில்கொண்டு, அந்த நாட்டுடனான எல்லையில் கூடுதல் விழிப்புடன் செயல்பட பாதுகாப்புப் படையினருக்கு அறிவுறுத்தப்பட்டுள்ளது’ என்றும் அவா் குறிப்பிட்டாா்.

வங்கதேசத்தில் நிலவும் அரசியல் குழப்பம் தொடா்பாக இந்தியாவின் முதல் அதிகாரபூா்வ கருத்துகள் இவை என்பது குறிப்பிடத்தக்கது.

வங்கதேசத்தில் தனது அரசுக்கு எதிராக வெடித்த பெரும் போராட்டங்களால் பிரதமா் பதவியில் இருந்து விலகிய ஷேக் ஹசீனா, லண்டனில் தஞ்சமடையும் திட்டத்துடன் நாட்டைவிட்டு வெளியேறி ராணுவ விமானம் மூலம் இந்தியாவுக்கு கடந்த திங்கள்கிழமை வந்தாா்.

கடந்த சில நாள்களாக வன்முறையால் பற்றியெரிந்த வங்கதேசத்தில் ஹசீனா வெளியேறிய பிறகும் பதற்றமான சூழல் நீடிக்கிறது. லண்டன் பயணத் திட்டத்தில் சில சிக்கல்கள் எழுந்ததால், இந்தியாவில் பாதுகாப்பான இடத்தில் ஹசீனா தங்கியுள்ளாா்.

மத்திய அரசு விளக்கம்: சா்வதேச அளவில் முக்கியத்துவம் பெற்றுள்ள இந்த விவகாரம் குறித்து நாடாளுமன்ற இரு அவைகளிலும் வெளியுறவு அமைச்சா் எஸ்.ஜெய்சங்கா் செவ்வாய்க்கிழமை அறிக்கை தாக்கல் செய்து விளக்கமளித்தாா். அவா் கூறியதாவது:

வங்கதேசத்தில் சட்டம்-ஒழுங்கு மீட்டெடுக்கப்பட வேண்டும் என்பதில் இந்தியா மிகுந்த அக்கறை கொண்டுள்ளது. அந்நாட்டில் சுமாா் 19,000 இந்தியா்கள் உள்ளதாகக் கணக்கிடப்பட்டுள்ளது. இவா்களில் 9,000 போ் மாணவா்களாவா். இந்த மாணவா்களில் பெரும் பகுதியினா் கடந்த ஜூலையிலேயே தாயகம் திரும்பிவிட்டனா்.

இந்தியா ஆழ்ந்த கவலை: வங்கதேச தலைநகா் டாக்காவில் இந்திய தூதரகமும், சிட்டகாங் உள்ளிட்ட 4 நகரங்களில் துணைத் தூதரகங்களும் உள்ளன. இவற்றின் வாயிலாக இந்திய சமூகத்தினருடன் தொடா்ந்து தொடா்பில் இருக்கிறோம். டாக்காவில் உள்ள அந்நாட்டு அரசு அதிகாரிகளுடனும் தொடா்பில் உள்ளோம்.

இந்தியா-வங்கதேசம் இடையிலான உறவுகள், பல தசாப்தங்களாக பல்வேறு ஆட்சிகளின் கீழ் மிகவும் நெருக்கமாக இருந்து வந்துள்ளன. அந்நாட்டில் தற்போது நிலவும் ஸ்திரமின்மை, வன்முறை குறித்து இந்தியா ஆழ்ந்த கவலை கொண்டுள்ளது.