தேவை... சூழலுக்கேற்ற சீர்திருத்தம்!

காவல் துறையில் பலர் அர்ப்பணிப்பு உணர்வோடு சட்டம் ஒழுங்கைப் பேணிக் காக்க தொடர்ந்து உழைக்கிறார்கள். அவர்களுக்கு சரியான கால இடைவெளிகளில் பதவி உயர்வு மற்றும் ஏனைய பணி சார்ந்த பயன்கள் மற்றும் அங்கீகாரம் உரிய நேரத்தில் வழங்கப்பட வேண்டும்.

- கட்டுரையாளர்: கல்வியாளர்.

சமூகத்தில் குற்றச் செயல்கள் புரிபவர்களை உரிய வகையில் அறிவுறுத்தியும் கண்டித்தும் சட்டப்பூர்வமான நடவடிக்கைகளை எடுத்தும் பொது அமைதியைப் பேண பெரிதும் துணை நிற்பவர்கள் காவல் துறையினர். துணிச்சலும், நேர்மையும், கருணையும் கொண்ட பலர் தமிழ்நாடு காவல் துறையில் இருக்கவே செய்கின்றனர். பேரிடர் நேரங்களிலும் பெருந்தொற்றுக் காலங்களிலும் தங்கள் உயிரைப் பணயம் வைத்து கடமையாற்றியவர்கள் நம் காவல் துறையினர். இப்படியாகப் பல பெருமைகளைத் தன்னகத்தே கொண்ட தமிழ்நாடு காவல் துறைக்கு இது ஒரு நெருக்கடியான காலம்.

பள்ளி, கல்லூரிகளில் அதிகரித்து வரும் போதைப் பொருள்களின் நடமாட்டம், தொழில்நுட்ப வளர்ச்சி மற்றும் தகவல் தொடர்பு சாதனங்களைப் பயன்படுத்தி நிகழும் பொருளாதார மோசடிகள் உள்ளிட்ட கண்காணிப்புகளைக் கடந்த குற்றச்செயல்கள் பெருகிவருகின்றன. காவல் துறை மீதான நம்பகத்தன்மையை சீர்குலைக்கின்ற இத்தகைய நிகழ்வுகள் வேரோடும் வேரடி மண்ணோடும் களைந்தெறியப்பட வேண்டும்.

சமீபத்தில் கோயம்புத்தூரில் காவல் துறையின் தலைவர் ஒருவர் அறிக்கை ஒன்றை வெளியிட்டார். இன்னும் ஒரு மாதத்துக்குள் பள்ளிகளில் போதைப்பொருள் இல்லை என்ற நிலையை உருவாக்குவோம் என்பதுதான் அந்த அறிக்கை. இது பெற்றோர்களுக்கு ஒரு எச்சரிக்கை மணி. சமூக அக்கறை கொண்டவர்களுக்கு இது மனதை உலுக்கும் செய்தி. கிராமப்புறங்களில் தொடங்கி பெருநகரங்கள் வரை போதைப் பொருள்கள் விற்பனை கொடிகட்டிப் பறக்கின்றது.

தமிழ்நாட்டில் போதைப் பொருள் கடத்தல் மற்றும் விற்பனை தொடர்பாக மட்டும் கடந்த 5 ஆண்டுகளில் ஏறத்தாழ 45 ஆயிரம் வழக்குகள் பதிவு செய்யப்பட்டு 66 ஆயிரம் பேர் கைது செய்யப்பட்டுள்ளனர். வழக்கமான ஹெராயின், எல்எஸ்டி ஸ்டாம்ப், மெத்தம்பெட்டமின், கஞ்சா மற்றும் போதை மாத்திரைகள் ஆகியவற்றோடு தற்போது அதிகம் தீங்கிழைக்கும் சிந்தட்டிக் என்ற வேதிப் போதைப் பொருள் புழக்கமும் அதிகரித்துவிட்டது. இதன் பரிமாற்றத்துக்கு சமூக ஊடகங்களும், கூரியர் மற்றும் பார்சல் நிறுவனங்களும் சமூக விரோதச் செயலில் ஈடுபடுபவர்களால் அதிகம் பயன்படுத்தப்படுகின்றன. அதனால் தற்போது தமிழ்நாடு அரசும் காவல் துறைத் தலைவரும் கூரியர் மற்றும் பார்சல் நிறுவனங்களுக்கு கடுமையான கட்டுப்பாடுகளை விதித்துள்ள செய்திகளைக் காண்கிறோம்.