கல்வி அறிவும், அதற்கு தேவையான வேலைவாய்ப்பினை அரசு தொடர்ந்து வழங்கி வருகிறது: பேரவைத் தலைவர் அப்பாவு பேச்சு

திருநெல்வேலி மாவட்டம், பாளையங்கோட்டை, தூய யோவான் கல்லூரிகளில் மாவட்ட வேலைவாய்ப்பு மற்றும் தொழில்நெறி வழிகாட்டும் மையம் சார்பில் நடைபெற்ற மாபெரும் தனியார் துறை வேலைவாய்ப்பு முகாமில், தமிழ்நாடு சட்டமன்ற பேரவைத் தலைவர் அப்பாவு, மாவட்ட ஆட்சித் தலைவர் சுகுமார் தலைமையில், நாடாளுமன்ற உறுப்பினர் ராபர்ட் புரூஸ், பாளையங்கோட்டை சட்டமன்ற உறுப்பினர் அப்துல் வஹாப், மாநகராட்சி மேயர் ராமகிருஷ்ணன், துணை மேயர் ராஜு ஆகியோர் முன்னிலையில் பணிநியமன ஆணைகளை வழங்கினார்கள்.

இம்முகாமில், தமிழ்நாடு சட்டமன்ற பேரவைத் தலைவர் அப்பாவு பேசியதாவது: தொழிலாளர் நலன் மற்றும் திறன் மேம்பாட்டு துறையின் கீழ் செயல்பட்டு வரும் வேலைவாய்ப்பு மற்றும் பயிற்றுத் துறையினரால் மாபெரும் தனியார் துறை வேலைவாய்ப்பு முகாம்கள் நடத்தப்பட்டு வருகிறது.

திருநெல்வேலி மாவட்டத்தில் கடந்த மே 2021 முதல் 3 கலைஞர் நூற்றாண்டு விழா சிறப்பு வேலைவாய்ப்பு முகாம்கள் மற்றும் டாடா சோலார் நிறுவனத்திற்கென பவர் பிரத்தியேகமான வேலைவாய்ப்பு முகாம் உட்பட, ஒன்பது மாபெரும் தனியார் துறை வேலைவாய்ப்பு முகாம்கள் நடத்தப்பட்டுள்ளது.

இம்முகாம்களில் இதுவரை 945 வேலை அளிக்கும் நிறுவனங்கள் கலந்து கொண்டு 6,316 பேருக்கு பணிநியமன ஆணைகள் வழங்கப்பட்டுள்ளது.

திருநெல்வேலி மாவட்ட நிர்வாகம், மாவட்ட வேலைவாய்ப்பு மற்றும் தொழில்நெறி வழிகாட்டும் மையம் மற்றும் தமிழ்நாடு மாநில ஊரக நகர்ப்புற வாழ்வாதார இயக்கம் இணைந்து நடத்திய பத்தாவது வேலைவாய்ப்பு முகாமில் கலந்து கொண்டு வேலை நாடுநர்களுக்கு பணிநியமன ஆணைகளை வழங்குவதில் மட்டற்ற மகிழ்ச்சியடைகிறேன்.

வேலைவாய்ப்பு முகாமில் 116 வேலை வழங்கும் நிறுவனங்கள் பல்வேறு பிரிவுகளில் வேலை நாடுநர்களை தேர்வு செய்ய இம்முகாமிற்கு வருகை புரிந்துள்ளனர். நடைபெற்ற முகாமில் 466 நபர்கள் பணிநியமன ஆணைகள் பெற்றுள்ளனர்.