રાજસ્થાનમાં બિપરજોયના કારણે ટ્રેન-ફ્લાઈટ રદઃ છ જિલ્લામાં રેડ એલર્ટ

૫૦થી ૬૦ કિમીની ગતિએ પવન ફુંકાયોઃ ૧૪ ટ્રેનો રદ કરાઈ

જયપુર, શનિવાર

ગુજરાત બાદ હવે રાજસ્થાનમાં ચક્રવાત બિપરજોયની અસર જોવા મળી રહી છે. આજે સવારથી બાડમેર, સિરોહી, ઉદયપુર, જાલોર, જોધપુર જિલ્લામાં વરસાદ પડી રહ્યો છે. ૫૦થી ૬૦ કિમી પ્રતિકલાકની ઝડપે પવન ફૂંકાઈ રહ્યો છે. છેલ્લા ૨૪ કલાક દરમિયાન તેની સૌથી વધુ અસર જાલોર, સિરોહી અને બાડમેરમાં જોવા મળી હતી. આ જિલ્લાઓમાં ચારથી પાંચ ઈંચ વરસાદ પડ્યો છે.

હવામાન વિભાગે બાડમેર, જાલોર, સિરોહી અને પાલી માટે રેડ એલર્ટ જાહેર કર્યું છે. એ જ સમયે રેલવેએ બાડમેરથી પસાર થતી ૧૪ ટ્રેન રદ કરી છે. એવી જ રીતે ઉદયપુરથી દિલ્હી અને મુંબઈની બે ફ્લાઈટ પણ રદ કરવામાં આવી છે.

પાકિસ્તાન સરહદને અડીને આવેલા બાડમેરના બખાસર, સેડવા ચૌહાતાન, રામસ૨, ધોરીમના ગામોના પાંચ હજાર લોકોને સુરક્ષિત સ્થાને ખસેડવામાં આવ્યા છે.