દીકરાનું બારમું પૂરું થતાં જ વીફરેલી બુટલેગરે પરિવાર સાથે મળી પાડોશીનું મકાન તોડી નાખ્યું

વિધિના કારણે પુત્રનું મોત થયું હોવાની અંધશ્રદ્ધા રાખીને હુમલો કરાયોઃ ત્રણ મકાનમાં તોડફોડ

મારા દીકરાને માતાજીની મૂઠ મારી છે, જેના કારણે તેનું મોત થયું છે તેવી અંધશ્રદ્ધા રાખીને બુટલેગરે તેના પરિવાર સાથે મળી પાડોશીનાં ત્રણ ઘર અને દુકાનમાં ભારે તોડફોડ મચાવી રીતસરનો આતંક ફેલાવતાં ચકચાર મચી ગઇ છે. દીકરાનું બારમું પૂરું થતાંની સાથે જ વીફરેલી મહિલા બુટલેગર પાડોશીના ઘરમાં પરિવાર સાથે ઘૂસી ગઇ હતી અને બબાલ શરૂ કરી દીધી હતી. બુટલેગર મહિલાની દહેશતના કારણે પાડોશી આખા પરિવાર સાથે નાસી ગયો છે. આ મહિલા બુટલેગર અને તેના પરિવાર વિરુદ્ધ સંખ્યાબંધ દારૂના ગુના પોલીસ ચોપડે નોંધાયેલા છે.