'അമ്മയുടെ ഫോട്ടോ എനിക്ക് മറക്കാൻ സാധിക്കുകയില്ല' ജോൺ ബ്രിട്ടാസ്

മറക്കാനാവാത്ത ചിത്രം

- എൽ. രാജശേഖരൻ മുതുകുളം

ജോൺ ബ്രിട്ടാസിനെ പരിചയപ്പെടുത്തേണ്ട കാര്യമില്ല. അദ്ദേഹം ഒരു രാഷ്ട്രീയക്കാരനും, പത്രപ്രവർത്തകനും, കൈരളി ടിവിയുടെ മലയാളം കമ്മ്യൂണിക്കേഷൻസ് ലിമിറ്റഡ് മാനേജിംഗ് ഡയറക്ടറും,എഷ്യാനെറ്റ് കമ്യൂണിക്കേഷൻസിന്റെ മുൻ ബിസിനസ് ഹെഡുമാണ്. 2021 ഏപ്രിൽ 24ന് സി.പി.ഐ (എം) നോമിനിയായി കേരളത്തിൽ നിന്ന് രാജ്യസഭയിലേക്ക് തിരഞ്ഞെടുക്കപ്പെട്ടു. ജോൺ ബ്രിട്ടാസ് ഫോട്ടോഗ്രാഫിയെക്കുറിച്ച് സംസാരിച്ചു തുടങ്ങി.

സ്കൂളിൽ പഠിക്കുമ്പോഴാണ് എന്റെ ആദ്യത്തെ ഫോട്ടോ എടുക്കുന്നത്. അത് ഇപ്പോഴും ഓർമ്മയുണ്ട്. കറുത്ത തുണിയിട്ടു മൂടിയ വലിയ ഒരു പെട്ടിയും മൂന്നു സ്റ്റാന്റുമായി വന്നാണ് ഒരാൾ എന്റെയും എന്റെ ക്ലാസ്സിലുളളവരുടെയും ഫോട്ടോ എടുക്കുന്നത്. പണ്ടത്തെ കാലത്ത് ഫോട്ടോഗ്രാഫർ എന്നു പറഞ്ഞാൽ ഒരു വലിയ വി.ഐ.പിയാണ്. മൂന്നുകാലിൽ നിർത്തിയ കറുത്ത തുണിയിട്ടുമൂടിയ ക്യാമറയുടെ പിന്നിലെ കറുത്ത തുണിയുടെ ഉള്ളിൽ കൂടി തലയിട്ട് ഫോട്ടോഗ്രാഫർ എന്റെയും എന്റെ കൂട്ടുകാരുടെയും സാറന്മാരുടെയും കൂടെയുള്ള ഫോട്ടോ എടുത്തു. അതാണ് എന്റെ ആദ്യ ഫോട്ടോ.

ആൾക്കാരെ ഇരുത്തുമ്പോഴും ഫോക്കസ് ചെയ്യുമ്പോഴുമെല്ലാം ആ ഫോട്ടോഗ്രാഫർ ഒരു ആജ്ഞാശക്തിയോടെയാണ് പെരുമാറിയത്. ഹെഡ്മാസ്റ്ററോടു പോലും തല നേരെ വെക്കുവാനും കൈമടിയിലേക്കു വെച്ച് നേരേ നോക്കിയിരിക്കാനുമൊക്കെ പറയുമ്പോൾ അദ്ദേഹത്തിന്റെ ഒരു അധികാരമാണ് അവിടെ സ്ഥാപിക്കപ്പെടുന്നത്.

അന്നത്തെക്കാലത്ത് ഫോട്ടോഗ്രാഫർക്കും ക്യാമറയ്ക്കും സമൂഹത്തിലുള്ളത് വലിയൊരു സവിശേഷമായ സ്ഥാനമാനമാണ്. ഇന്നത്തെ മലയാള സിനിമകളില് സൂപ്പർ സ്റ്റാറിനുള്ള സാന്നിദ്ധ്യമാണ് ഫോട്ടോഗ്രാഫർമാർക്ക് ഉണ്ടായിരുന്നത്. ആദ്യത്തെ ഫോട്ടോയെക്കുറിച്ച് ഓർക്കുമ്പോൾ എന്റെ മനസ്സിൽ വരുന്നത് ഫോട്ടോ എടുക്കാൻ വന്ന ഫോട്ടോഗ്രാഫറും അദ്ദേഹത്തിന്റെ ആംഗ്യ വിക്ഷേപങ്ങളും അദ്ദേഹത്തിന്റെ വലിയ ക്യമറയുമൊക്കെയാണ്.