ഭയത്തിൽ നിന്ന് ആശ്വാസമായെത്തിയ അത്ഭുതശക്തി

അനുഭവകഥ

- എൻ.ടി.സതീഷ് (9645456573)

അത്ഭുത സംഭവങ്ങളുടെ ആകെത്തുകയാണ് ജീവിതം. അതിന് നിദാനമാകുന്നത് പൂർവ്വ ജന്മ സുകൃതവും നാമറിയാതെ നമ്മെ പരിരക്ഷിക്കുവാൻ കൂടെ സഞ്ചരിക്കുന്ന ദൈവികശക്തിയു മാണ്. ആ ശക്തി പലർക്കും അനുഭവമാകുന്നത് സ്ഥിരമായി ആരാധിക്കുന്ന ദേവതകളുടെ സാക്ഷ്യ ഉടമ്പടികളിലും നിമിത്ത സൂചനകളിലൂടെയുമായിരിക്കും. എന്നെ സംബന്ധിച്ചിടത്തോളം എന്റെ ഇതുവരെയുള്ള ജീവിതം ദൈവത്തിന്റെ കയ്യൊപ്പ് പതിയുന്ന അത്ഭുത പ്രവർത്തനത്തിന്റെ ഭാഗം തന്നെ. പല ആപത്ഘട്ടങ്ങളിലും ദൈവം രക്ഷിച്ചെടുത്ത ജന്മമാണ് എന്റേത്. ജനിച്ച് നാലരമാസം കഴിഞ്ഞപ്പോൾ പോളിയോരോഗം വന്ന് ശരീരത്തിന്റെ വലതുഭാഗം തളർന്നിരുന്നു. അതുകൊണ്ട് സാധാരണ കുട്ടികളെക്കാൾ താമസിച്ചുമാത്രമാണ് എനിക്ക് മണ്ണിൽ ചുവടു വച്ച് നടക്കാനായതും. ഇടതു കൈകൊണ്ടെഴുതി തരക്കേടി ല്ലാത്ത വിദ്യാഭ്യാസം നേടാനായതും. പോളിയോയിൽ നിന്ന് അതി ജീവനം പ്രാപിച്ച് എന്നെ പിന്നീട് മരണം വേട്ടയാടിപ്പിടിക്കാനാഞ്ഞത് മൂന്നാം ക്ലാസിൽ പഠിക്കുമ്പോഴായിരുന്നു ഭിന്നശേഷിക്കാരനായ കുട്ടിയായതുകൊണ്ട് എല്ലാവരുടെയും സഹതാപം എന്നോടുണ്ടായിരുന്നു. അതുമായി ബന്ധപ്പെട്ട് ഒരുപാട് നേർച്ചകളും അതിന്റെ പേരിലുണ്ടായിരുന്നു. അതിന്റെ ഭാഗമായാണ് മൂന്നാം ക്ലാസിൽ പഠിക്കുമ്പോൾ മധുരയിലേയ്ക്കും പഴനിയിലേക്കും തുടർന്ന് ഗുരുവായൂരിലേയ്ക്കും തീർത്ഥയാത്ര ചെയ്യേണ്ടി വന്നത്. ഗുരുവായൂർ കുളത്തിൽ കുളിക്കവെ ഞാൻ അച്ഛനും സുഹൃത്തും അറിയാതെ മരണത്തിന്റെ അഗാധതയിലേക്ക് മുങ്ങിത്താഴുകയും ഒരു നിലവിളിയോടെ അച്ഛൻ കുളത്തിലേയ്ക്ക് എടുത്തുചാടി ആസന്നമൃതവിൽ നിന്ന് ജീവിതത്തിലേയ്ക്ക് കൂട്ടിക്കൊണ്ടുവന്നതുമായ ആ കഥ വേറിട്ട അനുഭവമാക്കി ജ്യോതിഷരത്നത്തിന്റെ ആദ്യ കാല ലേഖനങ്ങളൊന്നിൽ പ്രസിദ്ധീകരിച്ചിരുന്നു. ആ കഥ വീണ്ടും പറയാതെ എന്നെ പിന്തുടർന്നു കൊണ്ടിരിക്കുന്ന ആ അത്ഭുതശക്തിയുടെ മറ്റൊരു ആശ്ചര്യപ്രവർത്തനത്തിന്റെ കഥയാണ് ഇവിടെ പറയുന്നത്.