അയ്യപ്പചരിത കലാരൂപങ്ങൾ

തെക്കൻ കേരളത്തിൽ സമ്പ്രദായ ഭജനയ്ക്കാണ് പ്രചാരമെങ്കിൽ വടക്കർക്ക് ഉടുക്കുപാട്ടാണ് ശാസ്താംപാട്ട്, അയ്യപ്പൻപാട്ട്) ഏറെ പ്രിയം. മണ്ഡലകാലത്തെ കെട്ടുനിറയോടൊപ്പം അയ്യപ്പന്മാർ ക്ഷേത്രത്തിലോ, വീടുകളിലോ വച്ച് നടത്തുന്ന അനുഷ്ഠാനകലയാണിത്. കന്നി അയ്യപ്പന്റെ കെട്ടുനിറ അയ്യ ഷൻപാട്ടിന്റെ അകമ്പടിയോടെ വേണമെന്നാണ് വയ്പ്. മിക്കയിടങ്ങളിലും സന്ധ്യയോടെ ആരംഭിച്ച് പുലർച്ചെ വരെ നീണ്ടുനിൽക്കുന്ന ഉടുക്കുപാട്ട് ചിലയിടങ്ങളിൽ രാവിലെ മുതൽ സന്ധ്യവരെ നടത്തുന്നതായും കണ്ടിട്ടുണ്ട്. തണ്ടാർ സമുദായക്കാരാണ് ഇതിന് കാർമ്മികത്വം വഹിക്കുന്നത്.

- എസ്.പി.ജെ

അയ്യപ്പന്റെ ജനനത്തിന് മുമ്പുള്ള പന്തളം രാജാവിനെക്കുറിച്ചും, രാജകുടുംബത്തെക്കുറിച്ചുമുള്ള കഥ, അയ്യപ്പന്റെ ജനനം മുതൽ സ്വർഗ്ഗാരോഹണം വരെയുള്ള കഥ, വാവരുടെ ജനനം, ദേവാസുരയുദ്ധം, പാലാഴിമഥനം എന്നീ കഥകൾക്കൊപ്പം സുബ്രഹ്മണ്യസ്തുതി, സരസ്വതിവന്ദനം, പുലിസേവ എന്നിങ്ങനെയുള്ള അയ്യപ്പനുമായി ബന്ധമുള്ള മറ്റ് കഥകളും സംഗീതരൂപത്തിൽ അവതരിപ്പിക്കുന്നു. അഞ്ചോ അതിലധികമോ കലാകാരന്മാർ ചേർന്നാണ് പാടുന്നത്. എല്ലാവരും ഉടുക്ക് കൊട്ടിയാണ് പാടുന്നത്.

പൂജാവേദി കുരുത്തോല കൊണ്ടും, വാഴപ്പിണ്ടികൊണ്ടും ഭംഗിയായി അലങ്കരിക്കും. ഭംഗിയായി ഒരുക്കിയ പീഠങ്ങളിൽ വെള്ളവിരിച്ച് വിളക്കുവെച്ച് ശാസ്താവ്, ദേവി എന്നിവരെ ആവാഹിക്കുന്നു. ഗണപതിയൊരുക്കും ഇവിടുണ്ടാകും. പ്രധാന പൂജാവേദിക്കരുകിൽ തയ്യാറാക്കുന്ന പന്തലിൽ ഗണപതി, സുബ്രഹ്മണ്യൻ, കടുത്തസ്വാമി, വാവര് തുടങ്ങിയവർക്കായി പീഠങ്ങൾ ഉണ്ടാകും. പീഠത്തിന് മുമ്പിലെ ഇലയിൽ അവൽ, മലർ എന്നിവ വയ്ക്കുന്നു. ആദ്യ പൂജയ്ക്കുശേഷമാണ് പാടാൻ തുടങ്ങുന്നത്. ഉടുക്കുകൊട്ടി മുഖ്യഗായകൻ പാടുന്നു. മറ്റുള്ളവർ ഉടുക്കുകൊട്ടി ഇതേറ്റ് പാടും. അയ്യപ്പചരിതങ്ങൾ ഏഴ് സേവകങ്ങളായിട്ടാണ് പാടുന്നത്.(പാണ്ടിസേവം, പുലിസേവം, വേളിസേവം, പന്തള സേവം, ഈഴസേവം, വേളാർസേവം, ഇളവരശുസേവം) 7 താളത്തിലാണ് പാടുന്നത്.(ഏകം, രൂപകം, ചെമ്പട, മർമം, കാരിക, കുംഭം, പൂഴാരി, മുത്താളം, തെരളി) ഗണപതിയേയും, സരസ്വതിയേയും സ്തുതിച്ച് പാടിയതിനു ശേഷം മാത്രമേ മറ്റ് ദേവന്മാരെക്കുറിച്ച് പാടാവൂ എന്ന് നിയമമുണ്ട്. ആദ്യം ഗുരുവിനെ തൊട്ടു തൊഴുത് ഗണപതിയെ സ്മരിച്ച് ഗണപതിതാളം കൊട്ടിയശേഷം പാട്ടാരംഭിക്കുന്നു. പാട്ടിനോടൊപ്പം അയ്യപ്പഭക്തർ തുള്ളുകയും, ആഴികൂട്ടി എരിഞ്ഞടങ്ങിയ കനലിലേയ്ക്ക് ഇറങ്ങുകയും ചെയ്യുന്നു.(ആഴിപൂജ) ഉടുക്കു പാട്ട് അവസാനിക്കുന്നതോടെ അതിഥികളായി എത്തിയവർക്ക് പായസം നൽകുന്ന പതിവുമുണ്ട്.

വിൽപ്പാട്ട്