ശിവഭഗവാനോട് പറയാനുളളത് നന്തിയോട്

ദേവാധിദേവനായ ശിവഭഗവാന്റെ വാഹനമാണല്ലോ നന്തി. ശിവക്ഷേത്രങ്ങളിലൊക്കെയും ശ്രീകോവിലിനു മുന്നിലായി ഭഗവാനെ നോക്കിക്കിടക്കുന്ന നന്തിയുടെ പ്രതിഷ്ഠ കാണാം. സമ്പത്ത്, ഐശ്വര്യം, സമൃദ്ധി എന്നിവയുടെ പ്രതീകമായ നന്തിയെ നന്തികേശ്വരൻ, നന്തി പാർശ്വരൻ എന്നീ പേരുകളിൽ വിശേഷിപ്പിക്കാറുണ്ട്.

- പി.ജയചന്ദ്രൻ

ശരിക്കും ആരാണ് നന്തി?

കേവലം ഒരു വാഹനം എന്ന ബന്ധം മാത്രമണോ മഹാദേവനും നന്തിയും തമ്മിലുളളത്. അല്ല. ശിവഭഗവാന്റെ ദക്ഷിണഭാഗത്തുനിന്നും ഉടലെടുത്ത കാളയാണ് നന്തി. എന്നാൽ കശ്യപ മഹർഷിക്ക് കാമധേനുവിലുണ്ടായ പുത്രനായിട്ടാണ് വായുപുരാണത്തിൽ നന്തിയെ കുറിച്ച് പറയുന്നത്. ശിലൗദ മഹർഷിക്ക് ശിവഭഗവാന്റെ അനുഗ്രഹത്തിലുണ്ടായ പുത്രനായും ചില പുരാണ ങ്ങൾ നന്തിയെ വിശേഷിപ്പിക്കുന്നു. ചുരുക്കിപ്പറഞ്ഞാൽ ശിവഭഗവാന് ഏറ്റവും പ്രധാനപ്പെട്ട ഭൂതഗണമാണ് നന്തി. അതുകൊണ്ടുതന്നെ ശിവക്ഷേത്രങ്ങളിൽ ദർശനത്തിനെത്തുന്ന ഭക്തർ ശിവഭൂതഗണങ്ങളി ൽ ഏറ്റവും പ്രധാനിയായ നന്തിയെക്കണ്ട് തൊഴുതശേഷം മാത്രമേ ഭഗവാന് ദർശനം നടത്താവൂ എന്നാണ് പറയപ്പെടുന്നത്.

ദർശനത്തിനെത്തുന്ന ശിവഭക്തർക്ക് മനസ്സിൽ എന്തു സങ്കടമുണ്ടെങ്കിലും അത് നന്തിയുടെ കാതിൽ ചൊല്ലാവുന്നതാണ്. നന്തിയുടെ വായ പാതി അടച്ചുപിടിച്ച് ചെവിയിൽ മറുകരം ചേർത്തുപിടിച്ച് കാറ്റ് പോലും കേൾക്കാതെ രഹസ്യമായി പറയുന്ന സങ്കടം വളരെ വേഗത്തിൽ തന്നെ ഭഗവാന്റെ സമക്ഷം എത്തുമെന്നാണ് വിശ്വാസം. ഭഗവാന് ഏറ്റവും പ്രിയപ്പെട്ടവനാണ് നന്തി എന്നതുകൊണ്ട്ന ന്തിയോട് പറയുന്ന ഏതൊരു കാര്യവും ഭഗവാന് പ്രിയപ്പെട്ടതാണ്. മാർക്കണ്ഡേയ മഹർഷിക്ക് സ്കന്ദപുരാണം ഉപദേശിച്ചു കൊടുത്ത ജ്ഞാനിയായും ഒരു കുരങ്ങനാൽ രാവണരാജ്യമായ ലങ്ക കത്തിനശിക്കുമെന്നും ഒരു മനുഷ്യനാൽ രാവണൻ വധിക്കപ്പെടുമെന്നു ശപിച്ചതും നന്തിയാണ്.