അദ്ഭുതങ്ങൾ കാത്ത് ബ്രസീൽ

എല്ലാ ലോകകപ്പിലെയും പോലെയല്ല, ഇത്തവണ ബ്രസീലിന്റെത് അതിശക്തമായ നിര തന്നെയാണ്. 2018-ലെ തിരിച്ചടിക്കുശേഷം അവരുടെ കളി അടിമുടി മാറിയിരിക്കുന്നു. തനത് കളിരീതിയും യൂറോപ്പിൽ നിന്ന് പകർത്തിയ പുത്തൻ അടവുകളും ചേർന്ന ഗെയിംപ്ലാൻ ആണ് ടീമിന്റെ കരുത്ത്

- കെ.എം. നരേന്ദ്രൻ,  [e-mail]

 ബ്രസീൽ നമ്മളെയൊക്കെ അദ്ഭുതപ്പെടുത്തുകയാണ്. നെഞ്ചിൽ കൈവെച്ച് സത്യസന്ധമായിത്തന്നെ അക്കാര്യം പറയാം. ഒരുനിമിഷം, നമ്മൾ ഓരോ ലോകകപ്പ് തുടങ്ങുമ്പോളും എഴുതാറുള്ളതല്ലേ ബ്രസീലിന്റെ വീരചരിതങ്ങൾ? സാംബാതാളവുമായി മഞ്ഞക്കിളികൾ വരവായി... ഫുട്ബോൾ കിരീടം തലയിലേന്താൻ പെലെയുടെ നാടിന് സമയമായി എന്നൊക്കെ? എന്നിട്ടോ? ഒടുക്കം പവനായി ശവമാകും.

ഫൈനലിൽ പോലും എത്താതെ കാനറികൾ പുറത്താകും. 2014-ൽ ജർമനി ഏഴ് ഗോളുകൾ അടിച്ചുകയറ്റിയതും ഇതിൽ കൂടുതൽ അടിച്ച് നാണം കെടുത്തേണ്ട എന്ന് ജർമനി തന്നെ തീരുമാനിച്ചതുമായിരുന്നു ബ്രസീൽ എത്തിപ്പെട്ട ഏറ്റവും ആഴംകൂടിയ അവസ്ഥ. സത്യത്തിൽ ഖത്തറിൽ ലോകകപ്പ് നടക്കുന്ന ഈ 2022-ൽ 20 വയസ്സോ അതിൽ താഴെയോ പ്രായമുള്ള ഒരൊറ്റ ചെറുപ്പക്കാരനും ഓർമ്മയുണ്ടാവില്ല ബ്രസീൽ പണ്ട് ചാമ്പ്യന്മാരായത്. ഒരുപക്ഷേ, ആ ചെറുപ്പക്കാരെല്ലാം കാണുന്നുണ്ടാവും ഓരോ ലോകകപ്പിനും മുൻപ് കാല്പനികഭാഷയിൽ ബ്രസീലിനെ വാഴ്ത്തുന്നത്. എങ്കിൽ ഈ ലേഖനത്തിന്റെ തുടക്കത്തിലെ വാക്യങ്ങളും ഈ വഴിപാട് ചടങ്ങുകളുടെ ഭാഗമാണോ? അല്ല. അക്കാര്യം സത്യസന്ധമായിത്തന്നെ പറയാം. കാരണം, ബ്രസീൽ ഇത്തവണ മറ്റ് ടീമുകളേക്കാൾ ശരിക്കും മുകളിൽ തന്നെയാണ് കളിക്കുന്നത്.

റാങ്കിങ്ങും സാധ്യതകളും

ഫിഫ ലോകറാങ്കിങ്ങിൽ ബ്രസീൽ ഇപ്പോൾ ഒന്നാംസ്ഥാനത്താണ്. പക്ഷേ, അതുകൊണ്ടല്ല ബ്രസീൽ നമ്മെ അദ്ഭുതപ്പെടുത്തുന്നത്. കാരണം, റാങ്കിങ്ങിനെ ലോകകപ്പിലെ സാധ്യതയുമായി ബന്ധപ്പെടുത്താനേ കഴിയില്ല. ബെൽജിയം അതിന് ഉദാഹര ണമാണ്. ഇപ്പോൾ റാങ്കിങ്ങിൽ രണ്ടാമതുള്ള ബെൽജിയം കഴിഞ്ഞ നാലഞ്ചുകൊല്ലക്കാലം ഒന്നാം സ്ഥാനത്തായിരുന്നു. പക്ഷേ, അവർക്ക് 2018-ലെ ലോകകപ്പിൽ മൂന്നാംസ്ഥാനം മാത്രമേ കിട്ടിയുള്ളൂ. 2018-ലെ ലോകകപ്പിന് വരുമ്പോൾ ക്രൊയേഷ്യ ലോകറാങ്കിങ്ങിൽ അത്രയൊന്നും മുകളിലല്ലായിരുന്നു. പക്ഷേ, ലോകകപ്പിൽ അവർക്ക് രണ്ടാംസ്ഥാനം കിട്ടി. ലോക റാങ്കിങ്ങിൽ ഒന്നോ രണ്ടോ സ്ഥാനത്ത് കഴിഞ്ഞ ആറേഴ് വർഷമായി തുടരുന്ന ബെൽജിയത്തിന് യൂറോപ്യൻ ചാമ്പ്യൻഷിപ്പിൽപ്പോലും ചാമ്പ്യന്മാരാവാൻ കഴിഞ്ഞിട്ടില്ല. ബ്രസീൽ അദ്ഭുത ടീമാവാൻ കാരണം മറ്റ് ചില വസ്തുതകളാണ്. അക്കാര്യം മനസ്സിലാവാൻ ബ്രസീലിയൻ ഫുട്ബോളിന്റെ സമകാലിക ചരിത്രവും അവർക്ക് സംഭവിച്ച പതനവും അറിഞ്ഞ ഒക്കൂ.