വീട്ടിലെ കറന്റ്ബില്ല് കുറയ്ക്കാം

കുടുംബ ബജറ്റ് താളം തെറ്റിക്കുന്നതിൽ കറന്റു ബില്ലിനും പങ്കുണ്ട്

- സുമ മാക്സിമിൻ

ഷോക്കില്ലാത്ത കറന്റ് ബില്ല് ആഗ്രഹിക്കാത്തവർ ആരാണുളളത്. കുടുംബ ബജറ്റ് താളം തെറ്റിക്കുന്നതിൽ കറന്റു ബില്ലിനും പങ്കുണ്ട്. വീട്ടിലെ സീറോ വാട്ട് ബൾബും ശബ്ദമുണ്ടാക്കുന്ന പഴക്കം ചെന്ന ഫാനുകളും ഇനിയും മാറ്റിയില്ലേ ? അല്പം ശ്രദ്ധിച്ചാൽ കറന്റ് ബില്ല് മുപ്പത് ശതമാനത്തോളം കുറയ്ക്കാം. മാസമാസം കറന്റ് ബില്ല് കണ്ട് ചിലപ്പോഴൊക്കെ ഞെട്ടാറില്ലേ? എങ്ങനെയെങ്കിലും ബില്ലൊന്നു കുറയ്ക്കാമെന്നു വെച്ചാൽ നടക്കുന്നില്ല. അതുകൊണ്ട് തന്നെ ഇലക്ട്രോണിക്ക് ഉപകരണങ്ങൾ ഉപയോഗിക്കാൻ വീട്ടമ്മമാർക്ക് ഭയമാണ്. ഈ മാസവും കറന്റുബില്ല് ഷോക്കടിപ്പിക്കുമോ എന്ന പേടിയാണ് പലർക്കും. കേരളത്തിൽ ഏറ്റവും കൂടുതൽ വൈദ്യുതി ഉപയോഗിക്കുന്നത് വീട്ടാവശ്യത്തിനാണ്.  കുടുംബാംഗങ്ങളുടെ അശ്രദ്ധയും വീണ്ടുവിചാരമില്ലായ്മയുമാണ് കാരണം. വീടുകളിൽ വൈദ്യുതി കാര്യക്ഷതയോടെ ഉപയോഗിക്കുകയാണെങ്കിൽ ഏതാണ്ട് 400 മെഗാവാട്ട് ലാഭിക്കാനാകുമത്രെ. വൈകുന്നേരം 6 മണിമുതൽ രാത്രി 10 മണിവരെയാണ് പ്രത്യേകം ശ്രദ്ധ ചെലുത്തേണ്ടത്. കറന്റുബില്ല് കുറയ്ക്കാൻ ചില മാർഗ്ഗങ്ങളിതാ...

ഒരു വീട്ടിൽ ഏറ്റവും കൂടുതൽ കറന്റു തിന്നുന്നത് തേപ്പുപെട്ടി, പമ്പ്, ഫാൻ, ടി.വി, ഫ്രിഡ്ജ് ഇവയെല്ലാമാണ്. കാര്യക്ഷമതയോടെ ഉപയോഗിക്കുകയാണെങ്കിൽ കറന്റ് ലാഭിക്കാനാവും. ചിട്ടയും ശ്രദ്ധയും വേണമെന്നുമാത്രം.