Vintage Queen

ഒരിടവേളയ്ക്കുശേഷം സരിത ശിവകാർത്തികേയൻ നായകനായി അഭിനയിച്ച “മാ വീരൻ' എന്ന സിനിമയിലൂടെ ശക്തമായ ഒരു കഥാപാത്രത്തെ അവതരിപ്പിച്ചുകൊണ്ട് തിരിച്ചുവരവ് നടത്തിയിരിക്കയാണ്.

- അജയ്കുമാർ

എഴുപതുകളിലും എൺപതുകളിലും ദക്ഷിണേന്ത്യൻ സിനിമയിലെ നായികനിരയിൽ നിറസാന്നിദ്ധ്യമായിരുന്നു സരിത. ഒരു താരം എന്നതിലുപരി മികച്ച അഭിനേത്രി. മലയാളത്തിലേയും, തമിഴിലേയും തെലുങ്കി ലേയും പ്രഗത്ഭരായ സംവിധായകരുടെ ഇഷ്ട നടി. ഒരിടവേളയ്ക്കുശേഷം സരിത ശിവ കാർത്തികേയൻ നായകനായി അഭിനയിച്ച "മാ വീരൻ' എന്ന സിനിമയിലൂടെ ശക്തമായ ഒരു കഥാപാത്രത്തെ അവതരിപ്പിച്ചുകൊണ്ട് തിരിച്ചു വരവ് നടത്തിയിരിക്കയാണ്. എന്തുകൊണ്ടാണ് സരിതയ്ക്ക് സിനിമയിൽ ഇത്രയും വലിയ ഇട വേളയുണ്ടായത് എന്നതിനെക്കുറിച്ചും മറ്റും അടുത്തിടെ കണ്ടപ്പോൾ ചോദിച്ചു. സരിതയുമായുള്ള കൂടിക്കാഴ്ചയിൽ നിന്ന്

ഇത്രയും വർഷം സിനിമയിൽ അഭിനയിക്കാതിരുന്നതിന്റെ കാരണം എന്താണ്?

സരിത. ഇത്രയും വലിയ ഇടവേള സൃഷ്ടിച്ചത് ഞാൻ തന്നെയാണ്. അതിനു കാരണം മാതൃത്വമാണ്. ഇരുപത്തിനാല് മണിക്കൂറും ഒരു അമ്മയായി എന്റെ കടമകൾ നിർവ്വഹിക്കുവാൻ തന്നെ സമയം തികയാത്ത അവസ്ഥയായിരുന്നു. എല്ലാ സ്ത്രീകൾക്കും ഇങ്ങനെയൊരു കാലഘട്ടം ജീവിതത്തിൽ ഉണ്ടാവും. എന്റെ ജീവിതത്തിൽ ഈയൊരു കാലഘട്ടം ഞാൻ വളരെയധികം ആസ്വദിച്ചു. എനിക്ക് സിനിമയാണ് ജീവിതം. അതാണ് എല്ലാം... പക്ഷേ, ഒരു അമ്മ എന്ന നിലയിൽ കുട്ടികൾക്കല്ലേ മുൻഗണന നൽകേണ്ടത്. അതിനായി ചില ത്യാഗങ്ങൾ ചെയ്തേ പറ്റൂ. ഞാൻ ക്യാമറയ്ക്ക് മുന്നിൽ വന്നുനിന്ന് അഭിനയിച്ചില്ല എന്നേയുള്ളു. ഡബ്ബിംഗ് ചെയ്തുകൊണ്ട് സിനിമയിൽ സജീവമായിരുന്നു. അതുകൊണ്ട് സിനിമയും ഞാനും തമ്മിലുള്ള ബന്ധം തുടർന്നുകൊണ്ടേയിരുന്നു.