ഏതു കോളജിൽ പഠിക്കണം?

ഉന്നതപഠനത്തിന് കോളജ് തിരഞ്ഞെടുക്കും മുൻപ് മാതാപിതാക്കളും വിദ്യാർഥികളും നിർബന്ധമായും അറിയേണ്ട കാര്യങ്ങൾ

കേരളത്തിലെ ഉന്നത വിദ്യാഭ്യാസ സ്ഥാപനങ്ങളായ കോളജുകളും സർവകലാശാലകളും പുതിയൊരു അധ്യയന വർഷത്തിലേക്കു സഞ്ചാരം ആരംഭിക്കുകയാണ്. കുട്ടികളെ സംബന്ധിച്ചിടത്തോളം ഭാവിജീവിതത്തിലെ ഏറ്റവും നിർണായകമായ ഘട്ടവുമാണിത്. അതുകൊണ്ട് തന്നെ കോളജുകളുടെയും സർവകലാശാലകളുടെയും തിരഞ്ഞെടുപ്പിൽ പ്രത്യേക ജാഗ്രതയും ശ്രദ്ധയും പുലർത്തേണ്ടതുണ്ട്. ഒപ്പം അന്വേഷണവും ഗൃഹപാഠവും വേണം.

മുൻകാലങ്ങളിൽ നിന്നു വിഭിന്നമായി രാജ്യത്തിന്റെ ഏതു ഭാഗത്തുള്ള ഉന്നത വിദ്യാഭ്യാസ കേന്ദ്രത്തെ സംബന്ധിച്ചും കൃത്യമായ അറിവു ലഭിക്കുന്നതിനുള്ള സംവിധാനം ഇപ്പോൾ വിരൽത്തുമ്പിൽ ഉണ്ട്. ഈ സൗകര്യങ്ങൾ ഉപയോഗിച്ച് ഉപരിപഠനത്തിനു തിരഞ്ഞെടുക്കുന്ന കോളജുകളെയും സർവകലാശാലകളെയും സൂക്ഷ്മമായി അറിയാനുള്ള നിർബന്ധമായ ശ്രമം കുട്ടികളുടെയും രക്ഷിതാക്കളുടെയും ഭാഗത്തു നിന്ന് ഉണ്ടാകണം.

കേരളത്തിലെ കോളജുകൾ

കേരളത്തിലെ ഉന്നത വിദ്യാഭ്യാസ മേഖലയിൽ പ്രവർത്തിക്കുന്ന കോളജുകൾ നാലു തരമാണ്.

1. ഗവൺമെന്റ്, സ്വകാര്യ എയ്ഡഡ് കോളജുകൾ
2. സ്വകാര്യ എയ്ഡഡ് കോളജുകളിലെ സ്വാശ്രയ പ്രോഗ്രാമുകൾ
3. സ്വാശ്രയ കോളജുകൾ
4. ഗവൺമെന്റ്, എയ്ഡഡ്, സ്വാശ്രയമേഖലയിലെ സ്വയം ഭരണ കോളജുകൾ അഥവാ ഓട്ടോണമസ് കോളജുകൾ

 നമ്മുടെ സർവകലാശാലകൾ ഇപ്പോൾ ഏകജാലക സംവിധാനത്തിലൂടെയാണു വിവിധ കോളജുകളിലെ പ്രോഗ്രാമുകളിലേക്കു വിദ്യാർഥികളെ തിരഞ്ഞെടുക്കുന്നത്.

ഏകജാലകം എന്നതുകൊണ്ട് അർഥമാക്കുന്നത് ഒരു അപേക്ഷയിലൂടെ ആ സർവകലാശാലയ്ക്ക് കീഴിലുള്ള വ്യത്യസ്ത കോളജുകളുടെ വ്യത്യസ്ത പ്രോഗ്രാമുകൾക്ക് അപേക്ഷിക്കാം എന്നതാണ്. ഈ വിധം അപേക്ഷ സമർപ്പിക്കുമ്പോൾ കോളജുകളോടൊപ്പം ഗവൺമെന്റ് കോളജുകൾ, സ്വകാര്യ എയ്ഡഡ് കോളജുകൾ, കോളജുകളി ലെ സെൽഫ് ഫിനാൻസിങ് പ്രോഗ്രാമുകൾ, സെൽഫ് ഫിനാൻസിങ് കോളജുകൾ എന്നെല്ലാം വ്യക്തമായി രേഖപ്പെടുത്തിയിട്ടുണ്ടാകും. ഇതു  പഠിച്ചു മാത്രമേ ഓപ്ഷനുകൾ നൽകാവൂ.

ഗവൺമെന്റ് കോളജുകൾ